لۆبیی كوردستان لە ئەمەریکا

هەمیشە لە نووسینەكانمدا هەوڵم داوە، ڕوانینێكی نەتەوەیی لەسەروی بەرژەوەندییە تایبەت و تەسكەكانەوە بخەمە ڕوو،  بەردەوام ویستوومە بەو نووسینە سادە و ساكارانەم تۆوی ئومێد و یەكگرتوویی لەناو كێڵگە شەقارشەقار و وشكبووەكانی كۆمەڵگەی كوردستاندا بچێنم وبڵاو بكەمەوە، كەمتر بەدوای وەڵامدانەوەی هەندێ هەرزەی سیاسیم كە هەمیشە كاریان بەلاڕێدابردن و چەواشەكردنی خەڵكی كوردستانە و هەمیشە خراپیی باری ژیان و نادادپەروەری خەڵك دەكەن بە زادە و هۆیەك بۆ گەورەبوون و سەركەوتنیان لە هەڵبژاردنەكانی كوردستان و عێراق.

لەو دوو سێ ڕۆژەی ڕابردوودا، دوای ئەوەی بەڕێز مەسرور بارزانی سەرۆكی حكوومەت، بەیاوەریی شاندێكی گەورە كە لە هەردوو حزبی دەسەڵاتداری نێو حكوومەتی هەرێمی كوردستان پێ كهاتبوو، سەردانێكی سەركەوتوویان بۆ ئەمەریكا كرد، كە تیایدا چەندین دەسكەوتی گەورەی سیاسی، ئابووری، سەربازی و مۆراڵی و میدیایش بۆ كوردستان وەدی هات، مخابن ئەو گەشتە دیبلۆماسییە سیاسییە ئابوورییەی سەرۆكی حكومەت و شاندەكەی، لەلایەن ئەوانەی كە خۆیان بە ئۆپۆزسیۆن دەزانن، هەوڵی بێبایەخكردن و شێواندنی دەسكەوتەكانی درا.

دوو هەڵمەتی هاوشێوە دژ بەو گەشتە مێژووییە هەبوو،  یەكەمیان هەڵمەت و دژایەتیكردنی حكوومەتی بەناو فیدرالی عراقەوە  بوو، كە جەختی لەسەر نایاسایی گرێبەست و تەنانەت گەشتەكەش دەكردەوە، ئەوەش ڕەفتارێكی زۆر سروشتییە بۆ دەوڵەتێكی داگیركەر بەرامبەر بە وڵات و نەتەوەیەكی داگیركراو، چونكە مێژوو پێمان دەڵێ داگیركەران هەرگیز بەرژەوەندیی وڵاتە داگیركراوەكانیان ناوێت. دووەم هەڵمەت، لەلایەن ئەو كەس و لایەنانەوە بوون كە كوردن و خۆیان بە نەیار و ئۆپۆزسیۆنی سیاسیی حكوومەتی هەرێمی كوردستان دەزانن، كە لەڕاستیدا خەریكە كار و سیاسەتە چەواشەكارەكانیان بەتەواوی دەچێتە بەرژەوەندی و خزمەتكردن بە لایەنی یەكەمی هەڵمەتبەر (مەبەیستم دەوڵەتی عێراقە).

لەڕاستیدا، ئەو كار و جووڵانەی ئەو كەس و لایەنە گومڕا و سەرلێشێواوانەی نێو گۆڕەپانی سیاسیی كوردستان خەریكە بە تەواوی لە كاری ئاسایی سیاسەت و كاری پەرلەمانتاری و ئیتیك و ئەخڵاقی كوردەواریش لا دەدات، چونكە ئۆپۆزسیۆن لەهەر وڵاتێكدا بێت پێویستە بۆ بەرژەوەندی باڵای وڵات و دەربازبوون لەقەیرانەكان خەبات بكات، نەوەك تەنها بەرژەوەندی تەسكی حزبی و كۆكردنەوەی دەنگی هەڵبژاردنی لەبەرچاو بێت.

یەكێك لەوانەی كە خۆیان بە ئۆپۆزسیۆن دەزانن و لەو پانزە ساڵەی ڕابردوودا، ڕۆڵێكی زۆر خراپیان هەبووە لە نائومێدكردنی خەڵك و تەنانەت هۆیەکیش بوون بۆ لاوزكردن و پووكانەوەی لایەنە سیاسییەكەی خۆشیان، لێرەدا مەبەستم (هۆشیار عەبدوڵڵا)یە كە لە نووسینێكیدا ئاماژەی بەوە كردوە كە (پارتی) پارەی بەخشیوەتە ئەو سیناتۆر و پەرلەمانتار و سیاسی و كاربەدەستە حكوومەتییانەی ئەمەریكا! 

 منیش بە ((هۆشیار)) و هەموو ئەوانەی وەكو ئەو بە ناهۆشیاری بیردەكەنەوە و سیاسەت دەكەن، دەڵێم: كەواتە (پارتی) و حكوومەتی هەرێم ئەوەندە بەهێزە  و گەیشتووەتە ئاستێك كە توانیوییەتی لۆبی لەناو کۆنگرێس و حکومەتی ئەمەریکا و سەرمایەداران و میدیای ئەمریكاتیی دروست بکات، ئەوا جێگای سوپاس و ئافەرینە، بێگومان ئەو لۆبیكردنەش بەسوود و قازانجێكی سیاسی، ئابووری، سەربازی و مۆرالی زۆر گەورە بۆ کوردستان دەگەڕێتەوە، ئەگەر كورد ئەوەندە كارایە لە لۆبی دروستكردن كە هاوشێوەی لۆبی جوو لە ئەمەریکادا كار دەكات و بەهەژموونە، هەق وایە ((هۆشیار)) و ئەوانەش كە وەكو ئەو ناهۆشیارن واز لەكاری سیاسەت بهێنن و سیاسەتكردن و بەرزكردنەوەو دەربازكردنی كوردستان بۆ خەڵكی دڵسۆز و هۆشیار و سیاسەتزان و بوێر بەجێ بهێڵن.

 *لۆبي (lobby) وشەیەكی ئینگلیزییە بەمانای شوێنی پێشوازی دێت لە هوتیلەكاندا، بەڵام لەزمانی سیاسەتدا لۆبی یان لۆبی كردن بەمانای ئەو كۆمەڵە كەسانەوە دێت كە هەوڵدەدەن كە كاریگەری بخەنە سەر بڕیاری حكومەتەكان و دامەزراوەو و ڕێككخراوەكان.

هۆكاری ناولێنانەكەش بۆ ئەوە دەگەڕیتەوە كە هەمیشە ئەو كەس و كۆمەڵانە لەگەڵ كاربەدەستە گەورەكاندا لە پێشوازیی (لۆبی) ی هۆتێلەكاندا دادەنیشتن و ڕێكەوتنیان دەكردن.