بارەگەهێ بارزانی بوویە مەلبەندێ ئێکگرتن و ئێکرێزیا هێز و لایەنێن کوردی

هەردەم دۆژمنێن کوردان بۆ خوە مفای ژ ناکوکیێن هێز و لایەنێن سیاسی یێن کوردی دبینن و بۆ خوە بدەرفەت دزانن زیانێ پێ بگەهینن هەرێما کوردستانێ و ئەو سەرەدەریا خرابا نها حکۆمەتا ناڤەندی دگەل هەرێما کوردستانێ دکەت سەبارەت نەدانا شایستەیێن دارایی یێن هەرێمێ ئەگەرێ سەرەکی بۆ لاوازی و نەئێکگرتنا هێز ولایەنێن کوردی ل بەغدا دزڤریت.

جهێ خوشحالیێیە ل رێکەفتی (14/7/2025) ب سەرپەرشتیا جەنابێ سەرۆک بارزانی شاندێ پارتی دیموکراتی کوردستان و شاندێ یەکێتییا نشتیمانییا کوردستانێ ب سەرکردایەتیا پافل تالەبانی ل پیرمام کۆمبوون.

بێگومان بابەتێ سەرەکییێ ئەڤێ کومبوونێ پاراستنا دەسکەفت و پێگەهێ هەرێما کوردستانێ و نەدانا شایستەیێن دارایی یێن هەرێما کوردستانێ بوو ژلایێ حکوومەتا بەغداڤە و بەحس ل وێ سیاسەتا شوڤینی یا بەغدا ددەرحەقا هەرێما کوردستانێدا هاتە کرن.

پشتی کومبوونێ هەردوو ئالیان د بەیاننامەیەک ئێکگرتی دا، دا دیارکرن کو دڤێ کومبوونێ دا هەردوو ئالیان تەکەز ل یەکهەلویستی و یەکرێزیا هێزێن کوردی کریە ل بەغدا، بێگۆمان ئەڤ چەندە دێ بیتە ئەگەرێ بهێزکرنا پێگەهێ هەرێمێ ل بەغدا و ل ئایندەیەک نێزیک کاریگەریا ئەڤێ کومبوونێ دێ لسەر بریارێن حکوومەتا ناڤەندی دیار کەت.

ژبەر کو دیرۆک دیدەڤانێ ئەوێ چەندێ بوویە هەردەمێ هێزێن کوردی دناڤ خوەدا یەکهەلویست و یەکرێز بن ل بەغدا،  پێگەهێ هەرێما کوردستانێ بهێز دبیت و هەردەمێ هێزێن کوردی دناڤ خوەدا ناکوک بن، پێگەهێ هەرێما کوردستانێ ل بەغدا لاواز دبیت.

هەر ژبەر ڤێ جەندێ ددەمەکێ هوسا هەستیار دا لێکنێزیکبوونا هەردوو هێزێن دەستهەلاتێ د بەرژەوەندیا هەرێما کوردستانێ دایە و ئەڤ چەندە دێ بیتە ئەگەرێ بهێزبوونا پێگەهێ هەرێما کوردستانێ ل بەغدا و ئەم دشێین بشێوەیەکێ باشتر د چارچۆڤێ دەستۆرێ عێراقێ دا پاراستنێ لسەر مافێن ڕەوا یێن هەرێمێ بکەین ژ وان ژی شایستەیێن دارایی یێن هەرێما کوردستانێ و مووچەیێ فەرمانبەرێ هەرێمێ کو ئەڤە نێزیکی سێ مەهایە ژ لایێ حکوومەتا عێراقێڤە نەهاتینە ڤرێکرن بۆ هەرێما کوردستانێ ژ ئەگەێ چەندین بەهانەیێن بێ بنەما و بێ بها.