نێچیرڤان شێخ شامۆ
نووسەر
ئێزدی ل سەردەمێ حوكمڕانیا ڕێزدار مەسرور بارزانی دا
پشتی سەرهڵدانا بهارا 1991ێ، ژبەركو ئێزدی وەكو ڕەسەنێن ڤێ ئاخێ ب بەردەوامی ب روح و ماڵ و حاڵ و قوربانیدانێن خوە بەشەك بوونە ژ بزاڤا نەتەوی یا گەلێ كوردستانێ وخەلكەكێ زۆرێ ماندی و مەزلوم بووە، لەوما ل سەرهڵدانا پیرۆز ئەگەر پێكهاتەیێن دیترێن كوردستانێ جارەكێ هەست ب ئازادیێ كربت ئێزدیان دووجارا تام و بێهنا ئازادیێ كر، جارەكێ وەكو ئاین و بیروباوەر و جارەكێ وەكو ڕەسەنەتی و كوردبوون و نەتەوا وان.
پشتی قۆناغا دەستپێكرنا ئەزموونا حوكمرانیا هەرێما كوردستانێ، ل ژێر سێبەرا سیاسەتا حەكیمانە و ڕاسپاردەیێن بەردەوامێن جەنابێ سەرۆكێ ئاشتیخواز جەنابێ سەرۆك مسعود بارزانی، تا ڕادەیەكی زۆرباش قۆناغ بۆ قۆناغ ئێزدیان وەكو جڤاك و ئایين و تایبەتمەندی هەست ب ماف و ئازادی و هەبوونا خوە كرن، د ڤێ قۆناغا دەستپێكی دا ل كابینەیێن حكومەتێن ڕێزدار نێچیرڤان بارزانی دا گرنگیەكا تایبەت بۆ جڤاك و ئاینێ ئێزدیان هەبوو و كار و خزمەتێن گەلەك باش ل وی دەمی هاتنە پێشكێشكرن.
د سەردەمێ نۆكەدا ل كابینا نەهێ یا حكومەتا هەرێما كوردستانێ دا ب سەرۆكاتیا ڕێزدار كاك مەسرور بارزانی د ماوێ شەش سالێن بووریدا قۆناغەكا جیاواز یا ئاڤەدانكرنا كوردستانەكا بهێزتر و ئاڤەدانتر مینا شۆرەشەكێ ژبۆ دامەزراندنا ژێرخانا ژیانەكا ژهەژی بۆ هەموو خەلك و پێكهاتێن كوردستانێ دەستپێكر. ئەڤڕۆ ب زەلالی دهێتە دیتن و هەست دكەین خەونێن چەندەها ساڵا یێن خەلك و پێكهاتەیێن كوردستانێ ژبۆ پێدڤیێن دەستپێكی یێن ژیانێ هێدی هێدی یێ دبنە ڕاستی و ل سەر عەردێ دهێنە دیتن. ئەڤڕۆ ئەلكتیریكا 24 دەمژمێری و ڕێگاوبانێن ستاندارتێن نێڤدەولەتی و ئاڤەكا پاقژ و خزمەتگۆزاریێن دیتر یێن ژیانێ و سەدان پڕۆژەیێن ستراتیژی یێن بووینە هیڤیەكا مەزن ژبۆ ژیانەكا بەختەوەرتر و كوردستانەكا گەشتر و ئاڤەدانتر.
سەرەرای وان قەیران و شەڕێن سیاسی و گڤاشتنێن بەردەوامێن ناحەزان لێ ب خوەڕاگری و پشتگیریا خەلكێ كوردستانێ كابینا نەهێ ب ڕێبەریا سەرۆكوەزیران ڕێزدار مەسرور بارزانی ب ئیرادەیەكا قایم وەكو موعجیزەیەكێ ئەڤ هەموو پێشكەفتن و خزمەتگۆزاری و پڕۆژێن ستراتیژی و بنەجی بێ جیاوازی ل هەموو پارێزگەه و ئیدارێن سەربەخۆ و قەزا و ناحیێن هەرێما كوردستانێ ب ئەنجام گەهاندینە.
ئێزدی ژی وەكو بەشەك ژ جڤاكا كوردستانی وەكو هەر هاوڵاتیەكی ژوان پڕۆژە و خزمەتێن ژێرخانا ژیانێ یێن كابینا نەهێ پێشكێشكرین مفادار بووینە، لێ گرنگە ئەم وێ ڕاستیێ بێژین كو كاك مەسرور بارزانی هەر ژدەستپێكا دەست ب كاربوونا خوە ب چاڤەكی تایبەت تەماشای تایبەتمەندیا ئێزدیان كریە و هەوڵدایە ل گۆڕەی ڕەسەنەتی و نەهامەتیێن ب سەرێ وان هاتین خزمەتا ڤێ ئۆلا ڕەسەن بهێتەكرن و چەندین كار و پڕۆژە و دەستپێشخەریێن جوان پێشكێشی جڤاكا ئێزدیان كرینە و فەرە ب وژدان دچەند خالاندا دیارترین خزمەت و پڕۆژەیێن كابینا نەهێ ژبۆ جڤاك و ئاینێ ئێزدیان ڕێز بكەن:
1-ئاڤاكرنا قەسر و دیوانخانەكێ بۆ بابە شێخێ ئێزدیان كو د واتایا ڕەسەندا مالا هەر ئێزدیەكی یە و ژبۆ خزمەتا وان یا ئۆلی و جڤاكی یە.
2-دابینكرنا موچەیەكی مانگانە ژبۆ پیاوێن ئایینێ ئێزدیاتیێ وەكو ڕێزلێنانەك.
3-دروستكرنا دەروازێ سەرەكی یێ پەرستگەها پیرۆزا لالش ب شێوازەكی كەڤنار و لایق.
4- دروستكرنا كارگەها گڤاشتنا زەیتوونا و چێكرنا زەیتێ د هندروێ پەرستگەها لالش دا ژبۆ خزمەتا ڕێورەسمێن ئۆلی.
5-دروستكرنا عمبارەكا ئاڤێ دگەل هەموو پێدڤیێن وێ ژبۆ پەرستگەها لالش.
6-دروستكرنا جووتسایدێ پەرستگەها لالش ژ دەروازێ سەرەكی هەتا كو هندروێ پەرستگەهێ.
7-دروستكرنا جووتسایدێ شێخان بۆ پەرستگەها لالش ب شێوازەكی سەردەمیانە و ڕێكوپێك، هەروەسا بڕیارا دروستكرنا جووتسایدەكێ دیتر كو ژ زالگەها باعەدرێ دهێتە سەر هەمان جووتساید،بڤێ چەندێ خزمەتەكا مەزنا زیارەتكارێن پەرستگەها لالش دهێتەكرن و ئێدی كێشەیێن ڕێكێ هاتنوچوونێ نامینن.
8-ژ ڕوویێ ڕەوشەنبیری و جڤاكی ڤە پشتەڤانیا دارایی ژبۆ كار وخەباتا بنگەهێ لالش وەكو سازیەكا ڕەوشەنبیری و جڤاكی یا تایبەتمەند ب ئێزدیانڤە یا بەردەوامە، هەروەسا سەخبێركرنا هۆلێن لالش یێن جڤاكی ل گۆڕەی پێدڤیان.
9-ددەستپێشخەری و ڕێزلێنانەكا ژ هەژی دا جەنابێ سەرۆكێ حكومەتێ مینحەیەكا مانگانە دابینكر ژبۆ وان ئێزدیێن ژ دەستێ تیرۆرستان ڕزگاربووین و دیسان دابینكرنا دەلیڤەیێن خواَندنێ بۆ ڤی خەلكێ زولم دیتی و عەزیز.
10-د جۆمگێن ئیداریدا چەندین پۆست و پلەیێن تایبەت ب ئێزدیان هاتنە بەخشین.
11-كۆمەلگەهەكا وەكی خانكێ بڕیارا ناحیەبوونا وێ هاتە دەركرن و د ماوەیەكی كێم دا سنوورێ 11 ملیار دیناران خزمەتگۆزاری بۆ ڤێ ناحیا ئێزدینشین هاتنە پێشكێشكرن.
12-پڕۆژێ نووژەنكرنا مەزارگەها عەڤدێ رەش ل دێرەبوونێ دەڤەرا هەوێریا كو مەزارەكی ئۆلی یە ل سنوورێ ئیدارا زاخۆ، هەم خزمەتا ئۆلی یە هەم كەلتووری و گەشتیاریە بۆ خزمەتا خەلكێ دەڤەرێ كار تێدا بەردەوامە.
چەندین كار و پڕۆژەیێن دیتر بەرهەمێ دڵسۆزی و خەمخۆریا ڕێزدار مەسرور بارزانی نە بۆ ئێزدیا، ئەڤ یەكە جهێ پێزانینا جڤاكا ئێزدییە و هەلگرا گەلەك پەیامێن كور و سروشتییە، ئەڤ سەرەدەری و سیاسەتە تەكەزیێ دكەت ل ڕەسەنەتی و كوردبوونا ئێزدیا وەكو بەشەكێ سەرەكی و ڕەسەنێ كوردستانێ، دیسان نیشان و پەیاما وێ پێكڤەژیانێ یە یاكو چاڤكانیا وێ ژ فەلسەفە و ڕێبازا پیرۆزا بارزانی دهێت و ئەڤڕۆ ل ژێر سێبەرا جەنابێ سەرۆك بارزانی دا دهێتە خوەدیكرن و پەیڕەوكرن، هەروەسا پەیامەكا زەڵالە بۆ وان نەحەزێن ئێزدیا و كوردستانێ ئەوێن بەردەوام دەستێن فتنێ و دوبەرەكیێ درێژ دكەن و دەنگێن كەرب و كینێ دناڤبەرا ئێزدیا و پێكهاتێن دیترێن كوردستانێ دا بلند و بەڵاڤ دكەن.
ب دیتنا مە ئەڤ ئەزموونا حوكمڕانیا ڕێزدار مەسرور بارزانی د شەش سالێن بووریدا دەستپێكەكا زۆرا باش بوو بۆ كار و خزمەتێن ژهەژیتر بۆ جڤاكا ئێزدی و كوردستانێ ب گشتی و ئەم چاڤەرێی كار و بەرنامە و گاڤێن گەلەك مەزنترن ل داهاتی دا.
ل داویێ دبێژینە جەنابێ سەرۆكوەزیران ڕاستە ون پەروەردەیێ دەستێ جەنابێ سەرۆك بارزانی نە، ڕاستە ون ئەندازیارێ ئاڤاكرنا كوردستانەكا بهێزترن، ڕاستە ون برا گه‌وره‌یێ گه‌لن و هیڤی و ئۆمێدا ئەڤڕۆ و ئاینده‌نه، ل ژێر ڕێبەرایەتی و ڕاسپاردەیێن سەرۆك و ڕێزانێ گەلێ مه جەنابێ سەرۆك بارزانی و خەمخۆری و خوەڕاگریا جەنابێ سەرۆكوەزیران كاروانێ ئاڤەدانیێ ببه‌رده‌وامی د ڕێیەكا ڕاستڕا دمەشە و پێشڤەدچە.