ژ چیایێن کوردستانێ بۆ ڤاتیکان و داڤۆسێ

د دەمەکێدا کو نەخشەیێ لەشکەری و سیاسی یێ سووریا بەرەڤ گوهۆڕینێن رادیکال دچیت، هەرێما کوردستانێ جارەکا دی وەک ئەکتەرەکێ سەرەکی و وەک سەقامگیرا دەڤەرێ دەرکەفتە پێش. گوهۆڕینێن ل سووریا ب تنێ گوهۆڕینا هێزێ نینە، بەلکو تاقیکردنەکا دی یا نەتەوەیی یە بۆ کوردان، ب تایبەت ل رۆژئاڤایێ کوردستانێ.

پێشهاتێن لەشکەری ل سووریێ و شکەستنا بلەز یا رژێما سووریێ  و کۆنترۆلکرنا باژێڕێن ستراتیژی ژ لایێ گروپێن چەکدار ڤە، رۆژئاڤایێ کوردستانێ ئێخستییە بەرامبەر گەلەک ئەگەران. ل ڤێرێ رۆلێ جەنابێ سەرۆک مەسعوود بارزانی وەک لێڤەگەرێ  نەتەوەیی دەرکەفت.

سەرۆک بارزانی، کو خودان ئەزموونەکا درێژە د ناڤبەرا پێشهاتێن دەڤەرێ و دبلوماسییەتێدا، د پەیامێن خۆ دا جەختێ ل سەر پاراستنا ناسنامەیا نەتەوەیی و بێلایەنبوونا کوردان ژ شەڕێن مەزهەبی و تائیفی دکەت. هەلویستێ جەنابێ وان هەردەم  ئەوە کو رۆژئاڤایێ کوردستانێ پێدڤی ب ئێکگرتنییا ناڤخۆیی و دیالۆگێ هەیە دا کو دەستکەفتێن وان د ڤێ گوهۆڕینا مەزن دا ژ دەست نەچن.

د دەمەکێ دا کو دەنگێ تۆپ و تەیاران ل سووریا بلندە، ژبلی چەندین گەرێن دانوستاندنان ژلایێ جەنابێ سەرۆک بارزانی ڤە بۆ گەهاندنا دەنگێ کوردستانیان نوکە ل ڤاتیکانێ یە و سەرەدانا پاپایێ ڤاتیکانێدا و داخوازا پشتەڤانیێ بۆ رۆژئاڤا کر، مەسرور بارزانی، سەرۆکێ حکومەتا هەرێما کوردستانێ، ب رێکا دەرگەهێن دبلوماسی یێن بلند وەک کوربەندا داڤوس کار دکەت بۆ مسۆگەرکرنا پشتەڤانییا نێڤدەولەتی بۆ گەلێ کوردستانێ.

 ل داڤوسێ، مەسرور بارزانی پرسێن ئاسایش و ئابووری یێن دەڤەرێ گەنگەشە دکەت و پەیاما هەرێمێ دگەهینیتە خودان بڕیارێن جیهانێ کو کورد فاکتەرێ ئارامیێ نە.

ل ڤاتیکانێ: دیدارێن جەنابێ سەرۆک بارزانی دگەل پاپایێ ڤاتیکانێ، رەهەندەکێ مرۆڤی و پێکڤەژیانێ ددەتە دۆزا کوردستانیان ، کو ئەڤە دبیتە قەلغانەکا ئەخلاقی بۆ پاراستنا پێکهاتەیێن ئایینی و نەتەوەیی ل رۆژئاڤایێ کوردستانێ و هەرێمێ.

هەلویستێ هەرێمێ بەرامبەر رۆژئاڤا: پەیامەکا روون یا هەرێما کوردستانێ ب سەرکردایەتییا بارزانی، چەند خالێن سەرەکی وەک ستراتیژ بۆ رۆژئاڤایێ کوردستانێ د دیارکرینە:

 - ئێکڕێزییا لایەنێن کوردی: دوویرکەفتن ژ تاکڕەوییا سیاسی و کارکرن بۆ بەرژەوەندییا بلندا نەتەوەیی.

 - رێگریکردن ل کۆچبەرییا ب کۆم: هەولدان بۆ سەقامگیرکرنا دەڤەرێن کوردی دا کو خەلکێ رۆژئاڤا ل سەر ئاخا خۆ ب مینن.

 - پاراستنا سنووران: رێگری ل هاتنا  گروپێن توندڕەو بۆ ناڤ ئاخا هەرێمێ، دهەمان دەمدا دابینکرنا هاریکاریێن  مرۆڤی بۆ رۆژئاڤا.

- هەلویست و رۆلێ جەنابێ سەرۆکی بارزانی ب سیاسەتا حەکیمانە ئەوە کو مرۆڤ بشێت ژ ناڤ دلێ قەیرانان، دەرفەتان بۆ مللەتێ خۆ دروست بکەت."

 
ئەنجام: ئەڤرۆ رۆژئاڤایێ کوردستانێ دووریانەکا مێژوویی یە. سەرەدانا سەرکردێن هەرێمێ بۆ ناڤەندێن بڕیارێ ل جیهانێ، نیشانا هندێ یە کو کورد نەب تنێ ل سەر عەردی خودان هێزن، بەلکو ل سەر مێزا دبلوماسی ژی کارەکتەرێن سەرەکینە. ئاراستەیا بارزانی بەرەڤ ڤاتیکانێ، هەولەکا ب هێزە بۆ هندێ کو "سیناریۆیێن تەعل" دووبارە نەبن و کورد د نەخشەیا نوی یا سووریا دا خودان پێگەهەکێ پاراستی بن.