بە وێنە؛ کابینەی نۆیەم سەرجەم پێداویستییەکانی بۆ چاکسازی گەورانی هەولێر دابینکردووە

K24 - هەولێر

بەڕێوەبەری کارگێڕی و خۆیەتی، لە بەڕێوەبەرایەتی چاکسازی گەورانی هەولێر رایدەگەیەنێت، کابینەی نۆیەم سەرجەم پێداویستییەکانی بۆ بەندکراوان دابینکردووە. دەشڵێت، 1886 بەندکراو لە چاکسازییەکەدا هەن کە تەمەنیان لە سەرووی 18 ساڵییەوەیە.

دڵشاد عەلی، بەڕێوەبەری کارگێڕی و خۆیەتی، لە بەڕێوەبەرایەتی چاکسازی گەورانی هەولێر بە کوردستان24ـی راگەیاند، کابینەی نۆیەم سەرجەم پێداویستییەکانی بۆ بەندکراوان دابینکردووە، وەک بەفرگر، تەلەفزیۆن، سەرجەم ئەو شتانەی کە پێویستە، گۆڕانکارییەکی باشکرا لە ستافەکەدا، هەموو ئەو شتانە کراوە کە مافی سزادراوانە، لە رووی خۆراک و خواردنەوە رۆژانە سێ ژەم خواردن هەیە.

دڵشاد عەلی گوتیشی، "کابینەی نۆیەم هەموو هەوڵێکیدا لە وەزارەتی کاروباری کۆمەڵایەتی و لە بەڕێوەبەرایەتی چاکسازی خۆشمان، کە دەبێت بەپێی مافەکانی مرۆڤ ئێمە هەڵسوکەوت لەگەڵ سزادراواندا بکەین، لە کابینەی نۆیەمدا سزادراوان هیچ گرفتێکیان نەبووە، ئەم ستافەی کابینەی نۆیەم دایناوە هەمووی پسپۆڕن و شارەزان لەبواری خۆیاندا".

بەڕێوەبەری کارگێڕی و خۆیەتی ئاماژەی بەوەش کرد، "لە ئێستادا 1886 بەندکراومان هەیە کە تەمەنییان لە سەرووی 18 ساڵییەوەیە. زۆرترین سزادراویش بە تۆمەتی تیرۆرە، کە 705 سزادراون. 272 بە تۆمەتی کوشتن، مادەی هۆشبەر 384، دزی 103، تاوانەکانی جۆراو جۆریش 319 سزادراو هەیە. ئەگەر بەراوردی بکەین بە ساڵی 2016 و 2017 رێژەکە کەمتر بووەتەوە".