کارەکانی ڕێگەی بەدریک – باعەدرێ لە قۆناغی کۆتاییدان

ئەمڕۆ چوارشەممە، 05-06-2024، ماجد سەید ساڵح، جێگری پارێزگاری دهۆک بە کوردستان24ـی ڕاگەیاند، کارەکانی پرۆژەی ڕێگەی نێوان زاڵگەی "بەدریكێ" و ئۆڤەرپاسی ناحیەی باعەدرێ؛ کە بەشێکە لە ڕێگەی نێودەوڵەتی نێوان دهۆک و هەولێر، لە قۆناغی کۆتاییدان. ئاماژەی بەوەش کرد، سایدێک بۆ ڕێگاکە زیاد کراوە و سایدە کۆنەکەشی نۆژەن دەکرێتەوە.

درێژایی ڕێگاکە 22 کیلۆمەترە و بە گوژمەی نزیکەی 32 ملیار دینار بە هەماهەنگی لەنێوان ئیدارەی هەردوو پارێزگای دهۆک و نەینەوا جێبەجێ دەکرێت.  جێگری پارێزگاری دهۆک گوتی، "ڕێگاکە پێشتر یەک ساید بوو و زۆر ڕووداوی هاتووچۆ لێی تۆمارکراون، بە تەواوبوونی پرۆژەکە پێمان وایە ڕووداوەکانی هاتوچۆ بە شێوەیەکی بەرچاو کەم دەبنەوە".