بكوژێن پێشمه‌رگه‌هێ دهوكێ هاتن ده‌سته‌سه‌ر كرن
ئاسایشا دهوكێ د ده‌مه‌كێ كێم دا بكوژێن پێشمه‌رگه‌ى ده‌سته‌سه‌ر دكه‌ت
K24 – دهوك:
ئاسایشا دهوكێ د ده‌مه‌كێ كێم دا بكوژێن پێشمه‌رگه‌ى ده‌سته‌سه‌ر دكه‌ت.
محه‌مه‌د موسێ، پێشمه‌رگه‌یه بوویه سه‌ر ب لیوا، پلنگ، و د چه‌ندین شه‌رێن دژى چه‌كدارێن داعشێ پشكدارى كریه.
ل روژا 14 كانونا دوویێ/ یه‌نایر و ل وه‌ختێ كو محه‌مه‌د د بێنڤه‌دانێ دا بوویه و ل باژێرێ دهوكێ كارێ ته‌كسیێ دكر ژبو دابین كرنا پێدڤیێن ژیانێ، ژلایێ چه‌ند كه‌سه‌كان ڤه دهێت ره‌ڤاندن و بریندار كرن.
لدویف دویماهیك پێزانینێن ده‌ست (كوردستان24) كه‌فتین، بكوژێن محه‌مه‌دى ژلایێ ئاسایشا دهوكێ ڤه یێن هاتینه ده‌سته‌سه‌ر كرن، و د لێكولینان دا دیار دبیت كو محه‌مه‌د ب 18 چه‌قویان یێ هاتیه بریندار كرن و ئه‌ڤ برینه بووینه ئه‌گه‌را كو گیانێ خو لده‌ست بده‌ت.
په‌یامنێرێ كوردستان 24 ل شارێ دهوك، گه‌هشتیه مالا محمه‌مه‌دێ پێشمه‌رگه و ل سه‌ر ڤێ رویدانێ زێده‌تر پێزانین بمه‌را گه‌هاندن، كو محه‌مه‌د ل 14ێ كانونا دوویێ/ یه‌نایر ل ناڤ شارێ دهوكێ ژلایێ دوو كه‌سه‌كان ڤه دهێت ره‌ڤاندن، لدویف را داخازا كوژمه‌كێ پاره‌ى ل مالباتا محه‌مه‌دى دكه‌ن، به‌لێ به‌ریا ب رێكا پاره‌ى ئاریشه بێت چاره‌سه‌ر كرن، ئه‌و بكوژ ب چه‌ند چه‌قوویان محه‌مه‌دى بریندار دكه‌ن و به‌ره‌ڤ جهه‌كێ نه‌دیار ڤه دچن.
موسێ، بابێ، محه‌مه‌دێ جوانه مه‌رگ بو كوردستان 24 جڤیا و گووت: "محه‌مه‌دى چ ئاریشه دگه‌ل هیچ كه‌سه‌كى نه‌بوینه، نه ئاریشێت ئابورى مه هه‌بووینه، و نه ئاریشێت جڤاكى و خێزانى مه هه‌بووینه، لده‌مێ جاب بومه هاتى كو محه‌مه‌د یێ هاتیه ره‌ڤاندن و داخازا كوژمه‌كێ پاره‌ى دكه‌ن، مه خو به‌رهه‌ڤ كر، به‌لێ به‌ریا مه هنده‌ك كه‌سێن دیتر گه‌هشتبونه سه‌ر بكوژان، به‌لى پشتى كو ئه‌وان نزیكى 18 چه‌قوو ل گیانێ محه‌مه‌دى داین شیان خوه خلاس بكه‌ن".
ئه‌وژى گوت: "پشتى هنگى ئه‌م گه‌هشتین و مه محه‌مه‌د دیت كو یێ گرێدایه و نیشانێ برینا پێڤه دیاره و ئه‌م شیانین دگه‌ل باخفین و لدویف را مه گه‌هانده نه‌خوشخانا دهوك و نه‌خوشخانا ته‌نگاڤیان، پشتى هنگى مه گه‌هانده ولاتێ توركیا و ل ویرێ محه‌مه‌دى گیانێ خوه لده‌ست دا".
بابێ محه‌مه‌دى ئه‌و چه‌ند ژى راگه‌هاند كو: "ئاسایشا دهوك ب خه‌مخورى و دلسوزى ڤه د هاریكار بوینه و په‌یمان دایه وانا كو دێ بكوژان ده‌سته‌سه‌ر كه‌ن و په‌یمانا خوه بجه ئیناو د وه‌خته‌كێ كێم دا و ل روژا 28ى هه‌یڤێ ئه‌و بكوژ ده‌سته‌سه‌ر كرن".
لدویماهیێ بابێ محه‌مه‌دى داخاز ل حكومه‌تا هه‌رێما كوردستانێ كر كو ب ئه‌ركێ خورابیت و یاسا رولێ خوه بببینیت و حه‌قێ وانا ژ گونه‌هباران وه‌ربگریت.
