ئەحمەد كانی: گۆڕان بەھەڵە لە بار و دۆخی ھەرێمی كوردستان گەیشتووە
پسپۆرێک: گۆڕان هەست بە شەرم دەکەن بەرامبەر بە جەماوەریان و رای گشتیی
K24- ھەولێر:
دوو رۆژ لەمەوبەر بزوتنەوەی گۆڕان پرۆژەیەكی چاكسازیی بۆ بارودۆخی ئێستای ھەرێمی كوردستان و قەیرانی دارایی راگەیاند، لە بەرامبەردا ئەحمەد كانی، ئەندامی سەركرادیەتی پارتی دیموكراتی كوردستان دەڵێ گۆڕان بەھەڵە لە بار و دۆخی ھەرێمی كوردستان گەیشتووە.
ئەحمەد كانی راشیگەیاد: "خوێندنەوەی بزوتنەوەی گۆڕان بۆ ئەو بار و دۆخە زۆر ھەڵەیە، ئەو پڕۆژەیەی گۆڕان خزمەت بە كوردستان ناكات لە رووی ئەوەی لایەنەكان لە یەكتر نزیك بكاتەوە".
هاوکات ساماڵ عەبدوڵڵا، بەرپرسی مەكۆی گۆڕان لە ھەولێر گوتی: "ئەو پڕۆژەیە سەرنجی بزوتنەوەی گۆڕانە بۆ لایەنە سیاسییەكان بۆ ئەوەی گفتوگۆی لە سەر بكەن".
هەروەها عومەر نورەدینیی، مامۆستای زانكۆ لەبارەی ناوەڕۆكی پڕۆژەكەی بزوتنەوەی گۆڕان گوتی: "بزوتنەوەی گۆڕان ویستوویانە لە دۆخی ئێستا قسەیەكیان ھەبێت، جۆرێك لە شەرمیان ھەیە بەرامبەر بە جەماوەرەكەیان و رای گشتیی، لەو پڕۆژەیەدا گەڵاڵەیان كردووە لە چوارچێوەی ئەو پڕۆژەیەدا ".
لە 14 ئەم مانگە بزوتنەوەی گۆڕان دوو پڕۆژەی بۆ چارەسەری قەیرانی دارایی و بار و دۆخی سیاسیی ھەرێمی كوردستان خستەروو، لە گرنگترین خاڵەكانی پڕۆژەكەدا ھەموارکردنی یاسای سەرۆكایەتیی ھەرێمی كوردستان و وەرگرتنەوەی متمانە لە حكوومەتی ھەرێمی كوردستان بوو.
ئامادەكردنی: شنۆ محەممەد
