گوندی شێنێ بۆردومان كرا
K24 – قەڵادزێ
ئەمڕۆ فڕۆكە جەنگییەكانی توركیا، گوندی شێنێی سنووری قەزای پشدەریان بۆردومان كرد.
بەگوێرەی زانیارییەكانی پەیامنێری كوردستان24 لە ناوچەكە، كاتژمێر 11:00 سەر لە بەیانی ئەمڕۆ چەند فڕۆكەیەك ناو گوندی شێنێ و دەوروبەری گوندەكەیان بۆردومان كردووە.
بەکر وەیسی، بەڕێوبەری ناحیەی ھەڵشۆ بە کوردستان24ی گوت: "ئەمڕۆ سێ جار فڕۆکە ناو گوندی شێنێ و دەوروبەری لەسنوری قەزای پشدەر بۆردوومان کردووە و تا ئێستا فڕۆکە لە ئاسمانی ناوچەکەیە".
ئاماژەی بەوەشکرد: "تائێستا نازانرێت زیانی گیانی هەیە یان نا، چونکە نەمانتوانیووە بگەینە ناو گوندەکە، بەڵام زیانی ماددی زۆری گەیاندووە و خەڵکی دووچاری دڵەڕاوکێ کردووە".
بەپێی زانیارییەكان ھیچ بارەگایەكی پەكەكە لەناو گوندی شێنێ نییە، بەڵام بە ناوچەكەدا ھاتووچۆ دەكەن.