رووفاتی 104 ئێزدی بەخاکدەسپێردرێن

K24 – ھەولێر

لە رێوڕەسمێكدا لە گوندی کۆچۆی سنووری شنگال رووفاتی 104 ئێزدی بە خاكدەسپێردرێن، كە لەلایەن چەكدارانی داعشەوە شەھید كراون.

پەیامنێری کوردستان24 رایگەیاند، دوای هەوڵێکی زۆری حکومەتی هەرێمی کوردستان و حکومەتی عێراق، ناسنامەی 104 کەس لە قوربانیانی ئێزدی ئاشكرا كرا، کە لەسەر دەستی داعش شەهید کراون. ئەمڕۆ رێوڕەسمێکی تایبه‌ت بۆ گێڕانەوەی رووفاتەکانیان و دووبارە بە خاکسپاردنەوەیان لە گوندی کۆچۆ لە سنووری شنگال بەڕێوەدەچێت.

پەیامنێرمان ئاماژەی بەوەشکرد‌، شاندێکی حکومەتی هەرێمی کوردستان و حکومەتی عێراق و جینین پلاسخارت، نوێنەری تایبەتی سکرتێری گشتیی نەتەوە یەکگرتووەکان و کەریم ئەحمەدخان راوێژکاری تایبەت و سەرۆکی تیمی نەتەوە یەکگرتووەکانی تایبەت بە لێپێچینەوە لە تاوانەکانی داعش و نوێنەرانی نێردە دیپلۆماسییەکان، ئامادەی رێوڕەسمەکە دەبن.

لە 3/8/2014 چەكدارانی داعش پەلاماری شنگالیان دا و داگیریان كرد، لەگەڵ گەیشتنیان بە شنگال ژمارەیەك لە ئێزدییەكانی شنگالیان شەھید كرد و ژمارەیەكی دیكەشیان رفاندن.

لە 13/11/2015 ھێزی پێشمەرگە بە سەرپەرشتی راستەوخۆی سەرۆك بارزانی شنگالی لە دەست چەكدارانی داعش رزگار كرد.