پاپا فرانسیس: ھەموومان خەونێكی ھاوبەشمان ھەیە

K24 – ھەولێر

پاپا فرانسیس، پاپای ڤاتیكان لە قەرەقوش رایگەیاند "ھەموومان خەونێكی ھاوبەشمان ھەیە، دەبێ پێكەوە ھەوڵبدەین خەونەكانمان بێنینەدی".

دوای مووسڵ پاپا فرانسیس گەیشتە قەرەقوش و بە چەندین دروشمی جیاجیا لەلایەن پێكھاتەكان پێشوازی لێكرا. لە وتارێكدا پاپا گوتی: "ئێرە خاكی ھێنانەدی خەونەكانە، ئەو پێكەوەبوون لەنێوانتان ھەیە بیپارێزن، ھەندێك رووداو و دیاردە وادەكەن ئیمانت لاوازبێت، بەڵام ھەرگیز دەستبەرداری مەبن، دەبێ بڕوات بە خۆت و ئایینەكەت ھەبێت، لەبیرتان بێ كە خوا لە پشتانە، ھیواتان بە خوا و ئاسمان ھەبێت".

گوتیشی: "پێویستە روحییەتی لێبوردنمان ھەبێت و لە ھەموو كەس ببورین، چونكە ژیان بەردەوامە و رق و قینە لە ناخی خۆتان مەڕوێنن، لە ھەندێك كات ئەستەمە، بەڵام خواتان لەبیربێت، بڕیارەكانی ئێستا چارەنووسی داھاتوومان دیار دەكات".

لەمیانی كۆبوونەوەی لەگەڵ پێكھاتەكانی قەرەقوش، چەند كەسێك چیرۆكە تراژیدییەكانی ھاتنی داعش و لە دەستدانی كەسوكاریان بۆ پاپا گێڕایەوە.