بۆ یەکەمجار خانمە پێشمەرگەیەک بڕوانامەیەکی شاهانەی بەریتانیی سەربازیی پێدەدەرێت
بە سەرکەوتوویی خولەکەی تەواو کردووە
K24- هەولێر:
خانمە پێشمەرگەیەک کە خەڵکی هەرێمی کوردستانە، لە لایەن ئەکادیمیایی سەربازیی شاهانەی بەریتانیا ساندهورست، راهێنانی پێکرا و پلەی سەربازیی پێبەخشرا.
میدیا مەستی تەمەن 30 ساڵ، پێشتر وەک پزیشک لە نەخۆشخانەیەکی تایبەتی هێزەکانی پێشمەرگە خزمەتی کردووە و دواتر بەشداریی لە راهێنان و خولی ئەکادیمیی ساندهورستی کردووە.
لە مەراسیمێکدا، لە لایەن سوپای بەریتانیاوە بڕوانامەی تەواوکردنی خولەکە بە سەرکەوتویی درایە میدیا و 18 کەسی دیکە.
یەکەمجارە خانمێکی کورد لە راهێنانێکی ئاستبەرزی هاوشێوە بەشداریی دەکات و سوپای بەریتانیاش بە هەنگاوێکی کەم وێنە ناوی دەبات.
میدیا مەستی لەبارەی ئەو ئەزموونە نوێیەی رایگەیاندووە: ''دوو هەفتەی یەکەم سەخت بوو، بە تایبەت نووستن لە کەشوهەوایەکی زۆر سارد''.
میدیا شانازی بە بڕوانامەکەی دەکات و دەڵێت: ''هەرگیز بڕوام نە ئەکرد ئەم خولە تەواو بکەم و بگەمە ئێستا''.
بەریتانیا وەک بەشێک لە هاوپەیمانی نێودەوڵەتی بۆ جەنگی دژ بە داعش، مەشق و راهێنان پێشکەش بە هێزەکانی پێشمەرگە دەکات.