سەرۆکى هەرێمى کوردستان دۆخى ئەمنیى لەگەڵ وەزیرى ناوخۆى عێراق تاوتوێ دەکات
باسیان لە دۆخی سیاسی و ئەمنی عێراق کرد
K24- هەولێر:
نێچیرڤان بارزانى، سەرۆکى هەرێمى کوردستان، پێشوازى لە عوسمان ئەلغانمى، وەزیرى ناوخۆى عێراق کرد.
لە دیدارێکدا دوایین پێشهاتە ئەمنییەکانى عێراق، کار و ئەرکى هێز و دەزگا ئەمنییەکان بۆ پاراستنى ئارامى و ئاسایشى شارەکان، خۆپیشاندانەکانى ئەم دواییەى چەند پارێزگایەکى عێراق، مەترسیى سەرهەڵدانەوەى تیرۆر، هەنگاوەکانى جێبەجێکردنى ڕێککەوتنى حکوومەتى هەرێمى کوردستان و حکوومەتى فیدراڵى عێراق بۆ ئاساییکردنەوەى دۆخى شەنگال و چەند پرسێکى جێى بایەخى هاوبەشیان تاوتوێ کرد.
هەردوولا جەختیان لە پێویستیى پابەندى بە جێبەجێکردنى ڕێککەوتنى شەنگالەوە لەگەڵ خێراکردنى هەنگاوەکانی بە هاریکارى و هەماهەنگیى لایەنە پەیوەندارەکانى حکوومەتى هەرێمى کوردستان و حکوومەتى فیدراڵى عێراق کردەوە و هاریکاریى هاوبەش و هەماهەنگیى نێوان پێشمەرگە و سوپاى عێراقیان بۆ بەرەنگاربوونەوەى مەترسیەکانى داعش بە گرنگ و پێوست زانى.