وتەبێژی وەزارەتی تەندروستی هۆشداریی لەبارەی ئامارەکانی کۆرۆنا دەدات
''ژمارەیەکی زۆر لە کارمەندانی تەندروستی تووشی کۆرۆنا بوون''
K24- هەولێر:
د. ئاسۆ حەوێزی، وتەبێژی وەزارەتی تەندروستی لە هەژماری خۆی لە تۆڕی کۆمەڵایەتی فەیسبووک بڵاویکردەوە، ژمارەیەكی زۆر لە پزیشكان و كارمەندانی تەندروستی لە ئێستادا تووشبووی ڤایرۆسی كۆرۆنان.
ئاماژەی بەوەشکردووە، بێگومان ئەمەش بۆشاییەكی گەورەی لە كەرتی تەندروستی دروست كردووە و لەهەمان كاتدا رێژەی تۆماركراوانی رۆژانە نزیك دەبێتەوە لە 11٪.
وتەبێژی وەزارەتی تەندروستی دەڵێت، پێشبینی دەکەن ژمارەی تووشبووانی کۆرۆنا زۆر زیاد بکات؛ بۆیە داوا دەکات، هاووڵاتیان پابەندی رێنماییەکان بن.
ئەمەش لە کاتێکدایە، ئەمڕۆ هەینی، 725 كهس لە هەرێمی کوردستان تووشی كۆرۆنا بوون و 5 كهسیش بهو پهتایه كۆچی دواییان كرد.