له هه‌ولێر چه‌ندین شوێن به‌هۆی سه‌رپێچی رێنماییه‌كانی خۆپارێزی داخران
لە ماوەی (3) رۆژی رابردوودا بە ھۆی پابەندنه‌بوونی رێنماییەکان ژماره‌یه‌ك شوێن سزادراون
K24 - هه‌ولێر:
بۆ سنوردارکردنی ئامارەکانی تووشبون بە کۆرۆنا و راگرتنی بەرزبوونەوەی ئامارەکان لە پارێزگای ھەولێر، چەندین رێکار گیراونەتەبەر، جگە لەوەی چەندین شوێن بە ھۆی سەرپێچەوە داخراون و بەشێکیشیان سزا دراون، کارکردنی نۆرینگە پزیشکییەکانيش بە ھاوکاری لەگەڵ سەندیکای پزیشکان رێکدەخرێنەوە.
رێکارەکانی خۆپارێزی توندتر دەکرێنەوە و کاری تاقیگە و نۆرینگە پزیشکییەکانیش سنوردار دەکرێت و پابەند دەکرێن بە کەمترین سەردانکەر لە رۆژێکدا.
دلۆڤان محه‌مه‌د، بەڕێوبەری تەندروستی ھەولێر ئاشكراى كرد، ئامارەکان بەرزن و ھێشتا تووشبوويه‌كى زۆر لە نەخۆشخانەکان خەوێنراون، بۆ كه‌مكردنه‌وه‌ی مەترسییەکەش داوا ده‌كات کاری نۆرینگەکان رێکبخرێنەوە.
لیژنەکانی قایمقاميه‌ت راسپێردراون سەرجەم رێکارە تەندروستییەکان وەک خۆی جێبەجێ بکرێن و ھەر کەسێکیش پابەند نەبێت بە پێی ئەو بڕیارانەی ژووری ئۆپەراسیۆنەکانی ھەولێر دیاری کردووە، سزا دەدرێن.
نەبەز عه‌بدولحه‌مید، قایمقامی ناوه‌ندى ھەولێر گوتی: "نامانه‌وێت كاسبی خه‌ڵك تێكبچێت، به‌ڵام ئه‌گه‌ر خه‌ڵك پابه‌ند نه‌بێت، ئه‌وا بڕیاری دیكه ده‌ده‌ین، له ماوه‌ی رابردووشدا چاودێری شوێنه گشتییه‌كانمان كردووه و رێگه‌مان نه‌داوه یانه شه‌وانه‌كان كراوه بن، شوێنی نێلگه‌كێشانیش، كه هۆیه‌كه بۆ كۆبوونه‌وه‌ی گه‌نجان، رێگریمان لێكردووه بكرێنه‌وه".
بۆ کۆنترۆڵکردنی بارودۆخی تەندروستی و داخستنی ئەو شوێنانەی کە قەرەباڵغی دروست دەکەن و سنوردارکردنی سەردانیکەرانی نۆرینگەکان، چەند رێکارێکی گرنگ لە ھەولێر گیراونەتەبەر، لە ماوەی (3) رۆژی رابردووشدا زیاتر لە (70) شوێن سزادراون، بە ھۆی ئەوەی پابەندی رێنماییەکان نەبوون.
د.ی
