پەیامی سەرۆك بارزانی لە ساڵیادی داستانی پەڕینەوە لە رووباری ئاراس
K24 – هه‌ولێر:
حه‌فتا و چوار ساڵ به‌سه‌ر داستانی مێژوویی په‌ڕینه‌وه‌ی مسته‌فا بارزانی، رابه‌ری نه‌ته‌وه‌یی كورد و یاوه‌رانی له رووباری ئاراس تێده‌په‌ڕێت و له‌و بۆنه‌یه‌دا، سه‌رۆك مه‌سعود بارزانی له په‌یامێكدا رایگه‌یاند، داستانی مێژوویی پەڕینەوەی بارزانیی نەمر و یاوەرانی لە رووباری ئاراس رەتكردنەوەی داگیركاری و بندەستی بوو و، ئومێدی مانەوە و خەباتی لە دڵی گەلی كورد بە زیندوویی هێشتەوە.
سه‌رۆك بارزانی دووپاتیكردووه‌ته‌وه، لەو داستانە مێژووییەدا ئیرادەی گەلەكەمان بەسەر پیلانی دوژمنان سەركەوت و ئەوە سەلمێندرا كە ئیرادەی بەرخودان و خۆبەدەستەوەنەدان لەنێو رۆڵەكانی گەلی كوردا هەر دەمێنێت و ئەو ئیرادەیە لە هەموو هێز و سوپا و پیلانێك بەهێزترە.
ده‌قی په‌یامه‌كه‌ی سه‌رۆك بارزانی
بەناوی خودای بەخشندە و میهرەبان
ئەمڕۆ حەفتا و چوار ساڵ بەسەر داستانی مێژوویی پەڕینەوەی بارزانیی نەمر و یاوەرانی لە رووباری ئاراسدا تێدەپەڕێت. لە 18ـی حوزەیرانی 1947ـدا دوای پەنجاوسێ رۆژ شەڕ و بڕینی سنووری ئێران و عێراق و توركیا و رووبەڕووبوونەوەی سوپا و چەکدارانی سێ دەوڵەت و پووچەڵکردنی هەڕەشەی دوژمنان لە رێڕەوێكی دوورودرێژ و سەختدا بارزانیی نەمر و یاوەرانی توانیان لە رووباری ئاراس بپەڕنەوە و بچنە خاكی یەكێتیی سۆڤییەت. ئەو داستانە رەهەندی نەتەوەیی و مێژوویی و سیاسی و سەربازیی گەورەی هەبوو و، كاریگەرییەكی یەكلاكەرەوەی لەسەر مانەوەی دۆزی رەوای كورد لەو كات و لە قۆناغەكانی داهاتوو بەجێهێشت.
لەدوای رووخانی كۆماری كوردستان لە مەهاباد هەموو هەوڵی دوژمنان ئەوە بوو كە كۆتایی بە خەبات و تێكۆشانی گەلی ستەملێكراوی كورد بهێنن و ئیرادەی مرۆڤی كورد بشكێنن. بەڵام لەو داستانە مێژووییەدا ئیرادەی گەلەكەمان بەسەر پیلانی دوژمنان سەركەوت و ئەوە سەلمێندرا كە ئیرادەی بەرخودان و خۆبەدەستەوەنەدان لەنێو رۆڵەكانی گەلی كوردا هەر دەمێنێت و ئەو ئیرادەیە لە هەموو هێز و سوپا و پیلانێك بەهێزترە. داستانی مێژوویی پەڕینەوەی بارزانیی نەمر و یاوەرانی لە رووباری ئاراس رەتكردنەوەی داگیركاری و بندەستی بوو و، ئومێدی مانەوە و خەباتی لە دڵی گەلی كورد بە زیندوویی هێشتەوە.
مسعود بارزانی
18ـی حوزەیرانی 2021
رۆژمێری داستانی مێژوویی په‌ڕینه‌وه‌ی مسته‌فا بارزانی و یاوه‌رانی له رووباری ئاراس
16/12/1946 مسته‌فا بارزانی و قازی محه‌مه‌د له دوا دیداردا بڕیاری خۆیاندا. مسته‌فا بارزانی رایگه‌یاند، روو له چیاكان ده‌كات.
10/4/1947 شێخ ئه‌حمه‌دی بارزان و مسته‌فا بارزانی و خێزانه بارزانییه‌كان له چه‌می گاده‌ره‌ی سه‌ر سنووری ئێران و عێراق كۆبوونه‌وه.
16/4/1947 شێخ ئه‌حمه‌دی بارزانی و ده‌یان خێزانی یاوه‌ری په‌ڕینه‌وه عێراق و مسته‌فا بارزانیش رووی له چیاكان كرد.
19/4/1947 مسته‌فا بارزانی، 560 یاوه‌ری خۆی هه‌ڵبژارد و رایگه‌یاند، به نیازه بگه‌ڕێنه‌وه سنووری بارزان.
20/4/1947 مسته‌فا بارزانی و یاوه‌رانی گه‌یشتنه ناو خاكی عێراق و روویان له دۆڵی خواكورك كرد.
6/5/1947 مسته‌فا بارزانی له ناوچه‌ی ئه‌رگوش بڕیاری دا روو له یه‌كێتی سۆڤیه‌ت بكات.
23/5/1947 له ناو خاكی عێراق و له ناوچه‌ی هه‌ركی بنه‌جێ 14 فڕۆكه‌ی عێراق بۆردومانی كردن و 2 یاوه‌ری مسته‌فا بارزانی شه‌هید بوون.
25/5/1947 مسته‌فا بارزانی و یاوه‌رانی گه‌یشتنه خاكی توركیا و له‌وێوه روویان له ئێران كرده‌وه و به خاكی ئێراندا به‌ره‌و سنووری سۆڤیه‌ت رێگه‌یان گرته‌به‌ر.
16/6/1947 مسته‌فا بارزانی و یاوه‌رانی گه‌یشته رۆخی رووباری ئاراس.
18/6/1947 سه‌رجه‌م یاوه‌رانی مسته‌فا بارزانی په‌ڕینه‌وه و وه‌ك په‌نابه‌ری سیاسی له یه‌كێتی سۆڤیه‌ت ده‌رگایان بۆ كرایه‌وه.