ماکرۆن لە بەغدایە

K24 – هەولێر

سەرۆکی فەرەنسا بە سەردانێکی فەرمی گەیشتە عێراق و لە فڕۆکەخانەی نێودەوڵەتی بەغدا لەلایەن مستەفا کازمی سەرۆک وەزیرانی عێراق پێشوازی لێکرا، بریاریشە سبەی ماکرۆن سەردانی هەولێر بکات.

به‌ مه‌به‌ستی به‌شداریكردن له‌ كۆبوونه‌وه‌ی (کۆنگرەی هه‌رێمایه‌تی به‌غدا)، كه‌ بۆ پشتیوانی له‌ سه‌قامگیری عێراق و ناوچه‌كه‌ به‌ڕێوه‌ده‌چێت، ئیمانوێل ماكرۆن، سه‌رۆكی فه‌ره‌نسا درەنگانی شەوی رابردوو گەیشتە به‌غدا. بڕیاریشە ماكرۆن سەردانی هه‌رێمی كوردستان بکات و له‌گه‌ڵ سه‌رۆك بارزانی كۆ‌بێته‌وه‌ و دواتریش سه‌ردانی مووسڵ دەكات.

ئەمڕۆ کۆنگرەی بەغدا بۆ هەماهەنگی و هاوبەشی، بە بەشداری سەرکردە و بەرپرسانی 9 وڵاتی دراوسێ و هەرێمی، هەروەها نوێنەرانی یەکێتی ئەوروپا، نەتەوە یەکگرتووەکان، کۆمکاری عەرەبی و ئەنجومەنی هاریکاری کەنداو دەستپێدەکات، بۆ ئەم مەبەستەش رێوشوێنی ئەمنی توند لە بەغدا گیراوەتەبەر.