سەرۆکی حکومەتی هەرێمی کوردستان، کێشەکانی نێوان هەرێم و حکومەتی فیدراڵی، لە گەڵ سەرۆکی فەرەنسا تاووتوێ دەکات
ماكرۆن: هاتنمان بۆ کوردستان، پەیامێکە کە فەرەنسا دەستبەرداری دۆستەکانی نابێت
K24- هه‌ولێر:
ئەمڕۆ یەکشەممە 29 ی ئابی 2021 مەسرور بارزانی سەرۆکی حکومەتی هەرێمی کوردستان لە کۆبوونەوەیەکی ھاوبەشدا لە گەڵ سەرۆکی هەرێمی کوردستان و سەرۆکی پەرلەمان، لە گەڵ ئیمانوێل ماکرۆن سەرۆکی فەرەنسا کۆبووەوە.
لە کۆبوونەوەکەدا، ئامادەبووان بارودۆخی گشتی عێراق و ناوچەکە و پەرەپێدانی پەیوەندییەکانی نێوان هەرێمی کوردستان و فەرەنسایان تاووتوێ كرد.
سەرۆکی فەرەنسا ئاماژەی بە پەیوەندی مێژوویی نێوان فەرەنسا و هەرێمی کوردستان و رۆڵی پێشمەرگەی کوردستان بە رێبەرایێتی سەرۆك مەسعود بارزانی کرد لە تێکشکاندنی داعش، بەردەوامبوونی پشتگیریی و هاوکاریی وڵاتەکەشی بۆ هەرێمی کوردستان دووپاتکردەوە. گوتیشی هاتنمان بۆ کوردستان، پەیامێکە کە فەرەنسا دەستبەرداری دۆستەکانی نابێت .
لە دیدارەکەدا سەرۆکی حکومەتی هەرێمی کوردستان، ستایشی هەڵوێستی دۆستانەی فەرەنسای کرد لە پشتگیریکردنی هەرێمی کوردستان لە قۆناغە جیاوازەکاندا. ئاماژەشی بە گرنگیی كاركردن و هەماهەنگیکردن له‌گه‌ڵ فه‌ره‌نسا و كۆمه‌ڵگه‌ى نێوده‌وڵه‌تى کرد له‌پێناو چاره‌سه‌ركردنى كێشه‌كانى عێراق بەگشتی و کێشە هەڵپەسێردراوه‌کانی نێوان هەرێمی کوردستان و حکومەتی فیدراڵی بەتایبەتی، هەروەها رۆڵی ئەرێنی فەرەنساشی لە پێناو ئاسایش و سه‌قامگيرى ناوچه‌كه‌دا، بەرز نرخاند.
لە تەوەرێکی دیکەی کۆبوونەوەکەدا، باس لە گرنگیی جێبەجێکردنی رێککەوتننامەی شنگال و زەمینەخۆشکردن بۆ گەڕانەوەی ئاوارەکان بۆ ناوچەکانیان کرا.
