دادوه‌ر ده‌هام ئه‌كره‌م: كه‌مكردنه‌وه‌ی دوو كورسی پارتی زوڵم بوو
به هه‌ڕه‌شه، هه‌ندێك لایه‌نی خاوه‌ن ده‌سه‌ڵاتیان ناچار كرد داوا بكه‌ن ماوه‌ی تانه‌كه درێژ بكرێته‌وه
K24 – هه‌ولێر:
دادوه‌ر ده‌هام ئه‌كره‌م، ئه‌ندامی ئه‌نجوومه‌نی كۆمیسیۆنی باڵای سه‌ربه‌خۆی هه‌ڵبژاردنه‌كان، كه ماوه‌ی نزیكه‌ی 20 ساڵه دادوه‌ره و له پۆلێنی یه‌كه‌می دادوه‌رانی كۆمیسیۆنه رایگه‌یاند، له ژێر فشار و هه‌ڕه‌شه‌دا ماوه‌ی تانه لێدان درێژكراوه‌ته‌وه و كه‌مكردنه‌وه‌ی كورسیی پارتی زوڵم بوو.
له میانی به‌شداریكردنی له گه‌شتی هه‌واڵه‌كانی ئه‌مشه‌وی كوردستان24، دادوه‌ر ده‌هام ئه‌كره‌م، باسی بڵاوبوونه‌وه‌ی هه‌واڵێكی ناڕاست كرد و گوتی: سه‌باره‌ت به‌و هه‌واڵه‌ی گوایه من هۆكارم به له‌ده‌ستدانی دوو كورسییه‌كه‌ی پارتی، ئه‌و هه‌واڵه هیچ راستییه‌كی نییه و هۆكاره‌كه دیاره كێیه.
گوتیشی: دوای ئه‌وه‌ی هه‌ردوو كاندیدی پارتی به ناوی له‌یلا ئه‌كره‌م سه‌عید له هه‌ولێر و عه‌بدولسه‌لام شه‌عبان له مووسڵ له كاتی راگه‌یاندنی ئه‌نجامی كۆتایی براوه بوون و دوای پێشكه‌شكردنی تانه له لایه‌ن كاندیدانی لایه‌نێك، له ئه‌نجامی تانه‌كان ده‌ركه‌وت هه‌ندێك هۆكار هه‌بووه بۆ سووتاندنی ده‌نگی چه‌ند وێستگه‌یه‌ك.
هه‌روه‌ها گوتی: وه‌ك خۆم بڕوام به هۆكاره‌كان نه‌بوو، كه بوونه هۆی له‌ده‌ستدانی سه‌ركه‌وتنی ئه‌و دوو كاندیده.
له به‌شێكی دیكه‌ی قسه‌كانیدا ئه‌و دادوه‌ره گوتی: له باره‌ی تانه‌ی هه‌ولێره‌وه گوایه چه‌ند ده‌نگێك دووباره بووه‌ته‌وه و یه‌كێك زیاتر له جارێك ده‌نگی داوه، به‌ڵام نازانرێت ئه‌و كه‌سه‌ی كه زیاتر له دوو جار ده‌نگی داوه ده‌نگی بۆ كێ چووه، دووه‌م مافی ده‌نگده‌ر واده‌خوازێت ناوی ئاشكرا نه‌كرێت و نابێت ناوی بهێنرێت، جگه له هه‌موو ئه‌مانه، به پێی مادده‌ی 39 و بڕگه‌ی ج، له یاسای هه‌ڵبژاردن باسی ئه‌وه ده‌كات، ئه‌گه‌ر ده‌نگه‌كان دووباره بوونه‌وه و ده‌كرێت سندوقه‌كان بكرێنه‌وه و به ده‌ست بژمێردرێن و هه‌ر ئه‌نجامێك هه‌بوو، ئه‌وا په‌سند ده‌كرێت، دوای كردنه‌وه‌ی سندووقه‌كه ده‌ركه‌وت ئه‌نجامی ئه‌لیكترۆنی و به ده‌ست ژماردنی ده‌نگه‌كان له سه‌دا سه‌د وه‌ك یه‌ك بوون، به‌ڵام ده‌سته‌ی دادوه‌ری رایه‌كی دیكه‌ی هه‌بوو، به پێچه‌وانه‌ی مادده 39 بڕیاری دا به سووتاندنی كۆمه‌ڵێك وێستگه و ئه‌مه‌ش به زیانی كاندیده‌كانی پارتی شكایه‌وه.
گوتیشی: ده‌سته‌ی دادوه‌ری له 3 دادوه‌ر پێكدێت و ئه‌نجوومه‌نی كۆمیسیاران 9 كه‌سن و 7مان دادوه‌رین و له پۆلینی یه‌كه‌مین و دوانیش راوێژكارن و رای 9 كه‌س به‌هێزتره، به‌ڵام به پێی یاسا بڕیاری ده‌سته‌ی دادوه‌ری یه‌كلا كه‌ره‌وه‌ن، به‌داخه‌وه.
له باره‌ی درێژكردنه‌وه‌ی واده‌ی تانه لێدان، گوتی: ماوه‌ی تانه لێدان 3 رۆژ بوو، به‌ڵام دواتر ئه‌و لایه‌نانه‌ی كه ده‌نگێكی زۆریان له‌ده‌ستدابوو و كورسییان كه‌م هێنابوو، به فشاری شه‌قام و به هه‌ڕه‌شه، هه‌ندێك لایه‌نی خاوه‌ن ده‌سه‌ڵاتیان ناچار كرد داوا بكه‌ن ماوه‌ی تانه‌كه درێژ بكرێته‌وه و سێ رۆژی دیكه درێژكرایه‌وه و ئه‌وه‌یان به ده‌رفه‌ت زانی تانه بده‌ن و ده‌سته‌ی دادوه‌ریش ئه‌و بڕیاره‌ی دا.
دادوه‌ر ده‌هام ئه‌كره‌م، جه‌ختیكرده‌وه، كه هیچ كاتێك به‌رگری له لایه‌نێكی دیاریكراو نه‌كردووه و گوتی: به گوێره‌ی قه‌ناعه‌تی من زوڵم له‌و لایه‌نه كرا، كه كورسییه‌كانی كه‌م كرانه‌وه، جا هه‌ر لایه‌نێك بێت.
روونیشیكرده‌وه، بڕیاری ده‌سته‌ی دادوه‌ری بڕیاری كۆتاییه و ده‌كرێت هه‌وڵی دیكه‌ش بدرێت و په‌نا ببرێته به‌ر دادگای ئیتیحادی و من ناتوانم له‌و باره‌یه‌وه له جیاتی كه‌س قسه بكه‌م.