ئەو جەژنەی هەولێر رەشپۆش کرا
18 ساڵ بەسەر تەقینەوەکانی 1ی شوبات تێدەپەڕێت
K24 – هەولێر
ئەو بەیانیەی خەڵکی هەولێر نوقڵی جەژنانەیان دەبەشییەوە و گەردەن ئازاییان لە یەکتر دەکرد، تیرۆرستان وەک هەمیشە پیلانی خوێنڕشتنی مرۆڤەکانیان جێبەجێ کرد، لە یەکەم رۆژی جەژندا خەڵکی هەولێر و کوردستانیان رەشپۆش کرد.
لە یەکەم رۆژی جەژنی قوربانی ساڵی 2004، لە یەک چرکەسات دا دوو تەقینەوە لە هەردوو بارەگای لقی 2ی پارتی دیموکراتی کوردستان و مەڵبەندی 3ی یەکێتی نیشتمانی کوردستان ئەنجامدران، بەوهۆیەوە 103 کەس شەهیدبوون، لە نێویاندا ژمارەیەک سەرکردە و بەرپرسی حکومی و کادیری دیار بوون، ژمارەیەکی دیکەش برینداربوون.
ئەو کردەوە تیرۆرستییە لەکاتێکدا بوو، پرۆسەی ئاشتەوایی لەنێوان پارتی دیموکراتی کوردستان و یەکێتی نیشتمانی کوردستان، چوو بووە بواری جێبەجێکردنەوە و هەرێمی کوردستان بەرەو قۆناغی خزمەتگوازی و خۆشگوزەرانی هەنگاوی دەنا، بۆیە تیرۆرستان چاویان بە سەقامگیری کوردستان هەڵنەدەهات، لەم جەژنەدا جارێکی دیکە دەستی رەشیان چووە خوێنی رۆڵەکانی کوردستان.
لە یادی تێپەڕبوونی 18 ساڵ بەسەر ئەو کارەساتە، ئەمڕۆ سێشەممە 1/2/2022، بە ئامادەبوونی مەسرور بارزانی، سەرۆکی حکومەتی هەرێمی کوردستان و رێواز فایەق، سەرۆکی پەرلەمانی کوردستان لەسەر مۆنۆمێنتی شەهیدانی 1ی شوبات، لە پارکی سامی عەبدولرەحمان یادی شەهیدانی یەکی شوبات دەکرێتەوە.
وەزارەتى کاروبارى شەهیدان و ئەنفالکراوانی حکومەتی هەرێمی کوردستان لە یادی شەهیدانی 1ی شوبات راگەیاندراوێکی بڵاوکردەوە و ئاماژەی بەوە داوە: "18 ساڵ لەمەوبەر و لە رۆژى 1ى شوباتى ساڵى 2004 تیرۆریستان لە دوو کردەوەى خۆکوژیدا لە شارى هەولێرى پایتەختى هەرێمى کوردستان 103 بەرپرسى حکومى و سەرکردە و کادیر و پێشمەرگە و و هاووڵاتییان شەهیدکرد و ژمارەیەکى تریش بریندار بوون. ئەگەر چى تیرۆریستان بەو کارەیان ئامانجیان تێکدانى ئاشتى و گیانى لێبوردەیى و خۆشیەکانى جەژن بوو، بەڵام خوێنى شەهیدان و قوربانیەکان بوونە هەوێنى زیاتر بەهێزکردنى گیانى پێکەوەژیان و تەبایى و یەکێتى ریزەکانى گەلى کوردستان".
لە بەشێکی دیکەی راگەیەندراوی وەزارەتی شەهیدان هاتووە: "ئەمساڵیش کە یادى شەهیدانى ئەوکارەساتە دەکەینەوە لەگەڵ ناردنى دروود بۆ گیانى شەهیدانى کوردستان، گەل و حکومەتى هەرێمى کوردستان لە کاتێکدا شانازى بە ئاسایش و ئارامى کوردستان و خۆڕاگرى لە ئاست هەموو کارەسات و قەیرانەکان دەکات و لە هەمانکاتدا جەخت لە یەکخستنى هەوڵەکان دەکەینەوە بۆ دژایەتى فیکرى تیرۆر و بەرەنگاربوونەوەى تیرۆرستان".
