ئه‌مه‌ریكا باڵیۆزخانه‌كه‌ی له كیێڤ داده‌خات
K24- هه‌ولێر:
ویلایه‌ته یه‌كگرتووه‌كانی ئه‌مه‌ریكا رایگه‌یاند، باڵیۆزخانه‌ی وڵاته‌كه‌ی له كیێڤی پایته‌ختی ئۆكرانیا داده‌خات و ده‌یگوازێته‌وه بۆ شاری له‌ڤیڤ له رۆژئاوای ئه‌و وڵاته.
ئه‌نتۆنی بلینكن، وه‌زیری ده‌ره‌وه‌ی ئه‌مه‌ریكا له به‌یاننامه‌یه‌كدا گوتی: دۆخی سه‌ر سنووره‌كانی ئۆكرانی و رووسیا زۆر ئاڵۆزه و رووسیا هه‌موو ئاماده‌كارییه‌كی كردووه و هێزێكی زۆری له‌سه‌ر سنوور كۆكردووه‌ته‌وه.
هه‌روه‌ها ئاشكرایكرد، ئه‌مه‌ریكا باڵیۆزخانه‌كه‌ی له كیێڤی پایته‌ختی ئۆكرانیا داده‌خات و ئه‌ركه‌كه‌ی ده‌گوازێته‌وه شاری له‌ڤیڤیی "ئۆكرانیای رۆژئاوا" و جه‌ختی كرده‌وه، "باڵیۆزخانه‌ی وڵاته‌كه‌ی له كاركردن له‌گه‌ڵ حكومه‌تی ئۆكرانیا به‌رده‌وام ده‌بێت".
وه‌زیری ده‌ره‌وه‌ی ئه‌مه‌ریكا گوتیشی: داوا له هه‌ر هاووڵاتیێكمان ده‌كه‌ین، كه تا ئێستا له ئۆكرانیا ماونه‌ته‌وه، ده‌ستبه‌جێ ئه‌و وڵاته جێبهێڵن.
كه‌ناڵی (سی بی ئێس)ی ئه‌مه‌ریكیش له‌سه‌ر زاری به‌رپرسێكی باڵای وڵاته‌كه‌ی كه ئاماژه‌ی به ناوی نه‌كردووه، گواستییه‌وه، رووسیا چه‌كی قورس و مووشه‌كی دوورهاوێژی گواستووه‌ته‌وه ئه‌و شوێنه‌ی به نیازه هێرشه‌كه‌ی لێیه‌وه ئه‌نجام بدات.
وه‌ك ئه‌و كه‌ناڵه ئاماژه‌ی پێدا، له رێگه‌ی مانگه ده‌ستكرده‌كانه‌وه جووڵه‌ی هێزه‌كانی رووسیا بۆ هێڵه‌كانی پێشه‌وه‌ی هێرشكردن له سه‌ر سنووری ئۆكرانیا تۆماركراون.
H.B