پسپۆرێك له‌باره‌ی خۆڵبارینه‌وه روونكردنه‌وه ده‌دات
"هاتنی شەپۆلی خۆڵبارین هەرئەوەندە سادە نییە"
K24- هه‌ولێر:
پسپۆرێكی به‌رگری شارستانی له‌باره‌ی خۆڵبارینه‌وه ده‌ڵێت: "ئه‌گه‌ر خاوه‌نی باشترین ته‌ندروستی بیت، له‌كاتی خۆڵباریندا هه‌وڵبده زیاتر له كاتژمێرێك له ده‌ره‌وه بێ كار مه‌مێنه‌وه".
موقه‌ده‌م كاروان میراوده‌لی، راوێژکار و شارەزای دادی بەرگری شارستانی رایگه‌یاند، یەکێک لە گرفته سرووشتیەکان دروست بوونی ئەو گەردەلوول و شەپۆلە خۆڵبارینانەیە کە ساڵانە لە ئاسمانی عێراقدا دروست دەبن.
ئه‌و راوێژكاره‌ی به‌رگری شارستانی راشیگه‌یاند، ئەرکی بەرگری شارستانی لە كاتی درووستبوونی هەردوو جۆری (چەک و پەتا) بایه‌لۆژییەکان، ئامادەباشییه بۆ بە هانەوەچوونی هاووڵاتیان و چۆنیەتی درووستکردنی رێگاکانی خۆپاراستن و دابینكردنی میکانیزمی تاک پارێزیی.
موقه‌ده‌م كاروان میراوده‌لی، گوتی: "هاتنی شەپۆلی خۆڵبارین هەرئەوەندە سادە نییە، جگە لە دروستكردنی کێشە بۆ تەندروستی مرۆڤ، قوربانیشی لێده‌كه‌وێته‌وه".
هه‌روه‌ها گوتیشی: پێویستە لە حاڵەتی خۆڵباریندا چەند خاڵێکی گرنگ رەچاو بکەین:
1- ئەگەر کارێکی زۆر پێویستت نەبێت نابێت رێگا بە خۆت و تاکەکانی خێزان بدەیت بۆ چوونە دەرەوە.
2- بەهیچ جۆرێک گەشت و سەردانی دوور گونجاو نییە.
3- رادەی بینین کەم دەبێت، هەربۆیە پێویستە زۆر بەهێواشی رۆیشتن پیادە بکەیت.
4- نابێت لە رێگا سەرەکییەکان زۆر دوور بکەوینەوە.
5- رووناكی سەرەکی ئۆتۆمبێلەکانتان بەکار بهێنن، ئەگەر تاڕادەیەکیش بینینی بەردەمت بینراو بێت.
6- پێویستە ماسک بۆ خۆپاراستنت بەکار بهێنیت.
7- له‌كاتی خۆڵباریندا بە هیچ شێوه‌یه‌ك دەرگا و پەنجەرەی ماڵەکان نابێت بەشێوەی بەردەوام یان بۆ ماوەیەک كراوه بن، یاخوود جێهێشتنیان به كراوه‌یی گونجاو نییە.
8- پێویستە ئەو کەسانەی نەخۆشی رەبۆ و هەستیاری سنگ و پێستیان هەیە نابێت له‌كاتی خۆڵباریندا بچنه ده‌ره‌وه.
9- بۆ ئەو نەخۆشانەی به‌رده‌وام کێشەیان هەیە، پێویسته ئامێری تایبەت بەخۆیان هەبێت، چونکە له رۆژانی خۆڵبارین نەخۆشخانەکان قه‌ره‌باڵغ ده‌بن.
10- هەمیشە ژمارەی 122 تیمەکانی فریاگوزاری خێرای تەندروستی و (115 و 125) بەرگری شارستانیتان لا هه‌بێت.
11- هەرگیز بۆماوەیەکی زۆرتر لە كاتژمێرێک لەدەرەوە مه‌مێننه‌وه.
12- باشترین ئامۆژگاری مانەوەتانە لەماڵەکانتان، بۆ ئەوەی دووچاری مەترسی و لێکەوتە نه‌بنه‌وه.
