فڕۆکەکەی مۆسکۆ درێژترین گەشتی خۆی ئەنجامدا

K24 - هەولێر:

فڕۆکەیەك لە مۆسکۆوە بۆ گەڕاندنەوەی دیپلۆماتە دەرکراوەکانی لە ئسیپانیا و یۆنان، بەهۆی سزاکانی ئەوروپاوە، ناچاربوو درێژترین گەشت ئەنجامبدات کە دووریەکەی نزیک بوو لە گەشتی نێوان سینگاپۆر و نیویۆرک.

بە گوێرەی هەواڵێکی وێبسیاتی  flightradar24، سەرەتای ئەم هەفتەیە ئیسپانیا و یۆنان ژمارەیەک دیپلۆماتکاری رووسییان لە پایتەختی وڵاتەکانیان دەرکرد و رووسیاش بۆ گەڕاندنەوەیان لە مۆسکۆوە فڕۆکەیەکی ڕەوانە کرد.

سەرەڕای داخستنی ئاسمانی وڵاتانی ئەوروپا بەڕووی فڕۆکە رووسییەکاندا، ئیسپانیا و یۆنان لەپێناو گەڕاندنەوەی دیپلۆماتکارەکانی رووسیا بۆ وڵاتەکەیان بۆ یەکجار چاوپۆشییان لەو بڕیارە کرد و رێگەیاندا فڕۆکەکەی مۆسکۆ بێتە پایتەختی وڵاتەکەیانەوە.

کۆی دووری گەشتەکان 15,163 کیلۆمەتر بوو، ئەمەش نزیکە لە دووری گەشتی نێوان نیویۆرک و سینگاپۆرە، کە بە دریژترین گەشت لە جیهاندا ناسراوە.