سلێمانی.. شەش کەسی دیکە بەتۆمەتی تەقەکردن دەستگیرکران
پۆلیسی سلێمانی: لە کافتریایەکدا شەڕ و تەقەیان کردبوو
K24 - هەولێر:
بەڕێوەبەرایەتی پۆلیسی پارێزگای سلێمانی رایگەیاند، مەفرەزەكانی بەشی پۆلیسی فریاكەوتن و بنکەی پۆلیسی بەختیاری شەش تۆمەتباریان دەستگیرکرد کە لە کافتریایەکدا شەڕ و تەقەیان کردبوو.
لە راگەیەندراوەکەی پۆلیسی سلێمانیدا هاتووە، "دوای ئەوەی لەنا وکافتریایەکدا دەبێتە شەڕ و دەنگی تەقە دەبیسترێت مەفرەزەکانی بەشی پۆلیسی فریاکەوتن و بنکەی پۆلیسی بەختیاری گەیشتنە شوێنی رووداوەکە و سەرەنجام توانرا شەش تۆمەتبار دەستگیر بکرێن لەگەڵ چوار ئوتومبێلدا کە بەتۆمەتباران بووە، دەستیشگیراوە بەسەر چەکێکدا لەجۆری دەمانچە."
پۆلیسی سلێمانی ئاماژەی بەوەشدا، تۆمەتبارەکان لەدایکبووی ساڵانی نێوان 1989 بۆ 1998ـن و بە بڕیاری دادوەر ڕاگیراون و لێكۆڵینەوە لەگەڵیاندا بەردەوامە.
لە ماوەی دوو رۆژی رابردوودا، ئەمە دووەم حاڵەتی تەقەکردن بووە و رۆژی دوێنێ پێنجشەممە 12ـی ئایار، لەسەر شەقامی شەست مەتری سلێمانی لە ئاکامی شەرە تەقەی نێوان دوو بنەماڵە کرێکارێکی تەمەن 33 گیانی لەدەستدا و چەند کەسێکی دیکەش برینداربوون.
