چوار سەربازی تورکیا لە ناوچە سنوورییەکان کوژران

K24 – هەولێر

لە شەڕ و پێکدادانی نێوان سوپای تورکیا و هێزەکانی پەکەکە لە ناوچە سنوورییەکانی هەرێمی کوردستان چوار سەربازی تورکیا کوژران و دوو سەربازی دیکەش برینداربوون.

وەزارەتی بەرگری تورکیا لە راگەیەندراوێکدا ئاشکرای کرد، لە ئەنجامی هێرشێکی گەریلاکانی پارتی کرێکارانی کوردستان ( پەکەکە) لە زاپ، دوو سەربازی ئەوان کوژراون و چوار سەربازی دیکەش برینداربوون.

بەگوێرەی زانیارییەکان دوو لە سەربازە بریندارەکان گیانیان لەدەستداوە، بەمەش ژمارەی کوژراوان بووەتە چوار سەرباز.

لە 18ی نیسانی 2022، سوپای تورکیا ئۆپەراسیۆنی سەربازی لە زاپ، ئاڤاشین و مەتین بۆ سەر بنکە و بارەگاکانی پەکەکە دەستپێکردووە، بەهۆی شەڕی پەکەکە و تورکیاش لەو سنوورانە زیانی زۆری گیانی و مادی بەر گوندنشینان و گەشتیاران کەوتووە.