ئازاد محەمەد ئەمین: لەکاتی بوومەلەرزەکەوە سێکتەری تەندروستی دەربەندیخان نەهاتووەتە سەرخۆی
K24 - سلێمانی
سەرۆکی ئەنجومەنی پارێزگای سلێمانی رایدەگەیەنێت: لەکاتی بوومەلەرزەکەی ساڵی 2017ـەوە تائێستا سێکتەری تەندروستی دەربەندیخان نەهاتووەتە سەرخۆی.
ئەمڕۆ 13ی ئەیلوولی 2022، ئازاد محەمەد ئەمین سەرۆکی ئەنجومەنی پارێزگای سلێمانی لە کۆنفرانسێکی رۆژنامەوانیدا گوتی: "لە ساڵی 2017ـەوە لەوکاتەوەی بوومەلەرزە روویداوە لە دەربەندیخان سێکتەری تەندروستی نەهاتووەتە سەرخۆی، گلەیی ئەوەش هەیە تائێستا گرفتی هۆڵی نەشتەرگەری نەخۆشخانەی دەربەندیخان چارەسەر نەکراوە، بۆ ئەوەی نۆژەن بکرێتەوە و نەشتەرگەری تێدا بکرێت، دەبێ هاووڵاتییان بۆ نەشتەرگەری لە دەربەندیخانەوە بێنە سلێمانی، یەکێکی دیکە لە کێشەکانی خەڵکی دەربەندیخان تەواو نەبوونی پڕۆژەی چاککردنی رێگای سەرەکی دەربەندیخان-سلێمانییە".
ئەمڕۆ ژمارەیەک هاووڵاتی دانیشتووی دەربەندیخان بە رێپیوانەوە لە دەربەندیخان چوونە سلێمانی، بۆ ئەوەی کێشە و گرفتەکانیان بگەیەنە ئەنجومەنی پارێزگا، بەتایبەتی خراپی رێگاکەیان کە بە زۆرجار بە رێگای مەرگ ناودەبرێت.
سەبارەت بە کێشەی ئاوی دەربەندیخان، ئازاد محەمەد ئەمین سەرۆکی ئەنجومەنی پارێزگای سلێمانی دەڵێت: "کێشەی ئاوی دەربەندیخان یەکێکە لە کێشەکان پڕۆژەی ئاو کەوتووەتە بواری جێبەجێکردنەوە، بەڵام بەداخەوە جێبەجێ نەکراوە، ناکرێ خەڵکی دەربەندیخان لە پەنای زێی ئاوبن و ئاوێکی پاکی خواردنەوەیان نەبێت".
داواشیکرد، جگە لە بەدواداچوونی ئەوان، حکومەتی هەرێمی کوردستان تیمێکی راسپێردراوی هاوبەشی تەندروستی، شارەوانی و ئاوەدانکردنەوە بنێرێتە دەربەندیخان، بۆ ئەوەی گرفتەکانیان چارەسەر بکەن.
