بایدن: خۆم بۆ هه‌ڵبژاردنی ساڵی 2024ـی سه‌رۆكایه‌تی ئه‌مه‌ریكا كاندیدده‌كه‌مه‌وه
K24 - هه‌ولێر:
جۆو بایدن، سه‌رۆكی ویلایه‌ته یه‌كگرتووه‌كانی ئه‌مه‌ریكا رایگه‌یاند، به‌نیازه خۆی هه‌ڵبژاردنی ساڵی 2024ـی سه‌رۆكایه‌تی ئه‌مه‌ریكا كاندید بكات و ده‌ڵێت، هاوژینه‌كه‌ی پێیوایه وه‌كو سه‌رۆكی ئه‌مه‌ریكا كاری باشی ئه‌نجامداوه و پێویسته به‌رده‌وام بێت له‌سه‌ر ئه‌ركه‌كه‌ی.
رۆژی هه‌یینی (21ـی تشرینی یه‌كه‌م/ئۆكتۆبه‌ری 2022)، جۆو بایدن، سه‌رۆكی ویلایه‌ته یه‌كگرتووه‌كانی ئه‌مه‌ریكا له‌میانی چاوپێكه‌وتنێكدا له‌گه‌ڵ تۆڕی هه‌واڵی (ئێم ئێس ئێن بی سی)ـی ئه‌مه‌ریكی رایگه‌یاند: هه‌ر چه‌نده تا ئێستا بڕیاری كۆتاییم نه‌داوه و خۆم یه‌كلایینه‌كردووه‌ته‌وه، به‌ڵام به‌نیازم دووباره خۆم بۆ هه‌ڵبژاردنی ساڵی 2024ـی سه‌رۆكایه‌تی ئه‌مه‌ریكا كاندید بكه‌مه‌وه.
سه‌رۆكی ئه‌مه‌ریكا كه سه‌ره‌تای مانگی داهاتوو ته‌مه‌نی ده‌بێته 80 ساڵ و له‌كاتی هه‌ڵبژاردنی سه‌رۆكایه‌تی ئه‌مه‌ریكا له ساڵی 2024 ته‌مه‌نی ده‌بێته 82 ساڵ، باس له هه‌ڵوێستی هاوژینه‌كه‌ی ده‌كات له‌باره‌ی ئه‌دای كاره‌كه‌ی له‌ماوه‌ی چه‌ند ساڵی رابردوودا وه‌كو سه‌رۆكی ئه‌مه‌ریكا و بیرۆكه‌ی دووباره خۆ كاندیدكردنه‌وه‌ی بۆ ئه‌و پۆسته و ئاماژه به‌وه‌ده‌دات، هاوژینه‌كه‌ی پێیوایه وه‌كو سه‌رۆكی ئه‌مه‌ریكا له‌ماوه‌ی چه‌ند ساڵی رابردوودا توانیویه‌تی كاری باش ئه‌نجامبدات، هه‌ر بۆیه پێویسته وه‌كو سه‌رۆكی ئه‌مه‌ریكا به‌رده‌وام بێت.
له‌باره‌ی بانگهێشتكردنی دۆناڵد تره‌مپ، سه‌رۆكی پێشووی ئه‌مه‌ریكا له‌لایه‌ن لیژنه‌یه‌كی كۆنگرێسی ئه‌مه‌ریكاوه بۆ لێپرسینه‌وه له‌گه‌ڵ ناوبراو له‌باره‌ی هێرشه‌كانی رۆژی 21/1/2021 بۆ سه‌ر باڵه‌خانه‌ی كۆنگرێس، سه‌رۆكی ئێستای ئه‌مه‌ریكا گوتی: پێم وایه لیژنه‌كه كارێكی باشی ئه‌نجامداوه.