داعش هێرشیكرده سەر ناوچەیەكی سه‌ر به پارێزگای سەڵاحەددین
k24 - كەركووك:
لە شارەدێی تول ئەلباج سەر بە شارۆچكەی شەرگات لە پارێزگای سەڵاحەددین، چەكدارانی داعش هێرشیانكرده سەر باخی هاوڵاتییەك بەناوی سوهەیل نەجم شەمەری و رووبەڕووبوونەوەی سەخت روویداوە.
سەبارەت بە رووداوەكە، كاوە شێخابی راوێژكاری پارێزگاری سڵاحەددین بۆ كاروباری ئاسایش و سەربازی، بە كوردستان 24ـی راگەیاند، هێرشكاران چەكداری داعش بوونە و ژمارەیان پێنج كەس بووە و بۆ كوشتنی هاووڵاتییەك هاتوون كە باخێكی لە سنوورەكە هەیە، دوای ئاگاداربوونه‌وه‌یان شەڕی سەخت روویداوە و خەڵكی سنوورەكەش بەهانای ئەو هاووڵاتییەوە هاتوون، سەره‌نجام هەر پێنج چەكدارەكەی داعش كوژراون و هاووڵاتییەكەش بەناوی سوهەیل لەنێو ئۆتۆمبێلەكەیدا بە گولـله‌ی ئاربی جی كوژراوە.
گوتیشی: "ئێستا هێزە ئەمنییەكان گەمارۆی ناوچەكەیانداوە و لێكۆڵینەوە لە رووداوەكە دەستیپێكردووە".
