سوننە و شیعە لەسەر دیارکردنی لیژنەکانی پەرلەمانی عێراق ناکۆکن

K24 - بەغدا

ناکۆکی نێوان لایەنەکان رێگربوو لەوەی سەرۆک و جێگری سەرجەم لیژنەکانی پەرلەمانی عێراق یەکلایی بکرێنەوە. بەپێی رێککەوتنی نێوان لایەنەکان، کورد چوار سەرۆک لیژنە و 10 جێگری سەرۆک لیژنەکانی بەردەکەوێت.

سۆزان مەنسوور، ئەندامی فراکیسۆنی یەکێتی لە پەرلەمانی عێراق بە کوردستان24ی راگەیاند: "فراکسیۆنە کوردستانییەکان بە گشتی چوار سەرۆکی لیژنەیان بەردەکەوێت، لیژنەکان بریتین لە پەیوەندییەکانی دەرەوە، کۆچ و کۆچبەران، یاسایی و تەندروستی".

پێکھاتەکان گلەییان لە دیاریکردنی لیژنەکان ھەیە، ناڕازین لەوەی لیژنەی کۆچ و کۆچبەران نەدراوە بە پێکھاتەی ئێزیدی، چونکە ئێستا ئیزیدییەکان زۆرترین ئاوارەی ناوچەکانی عێراق پێکدەهێنن.

لەوبارەوە شەریف سلێمان، ئەندامی ئەنجومەنی نوێنەرانی عێراق دەڵێت: "ئێستا نزیکەی 16 کەمپی ئاوارەکان لە دهۆک و دەوروبەری تەنیا ئێزدییەکان لێی نیشتەجێن، بۆیە سەرۆکی لیژنەی کۆچ و کۆچبەران ‌‌مافی ئێزدییەکان دەزانین".

جگە لە کورد، لەسەر دیاریکردنی لیژنەکان، شیعە و سوننەش ناکۆکن، بەتایبەت سوننەکان، کە سەرۆکی پەرلەمان جێگۆڕکێی بە بەشێکی ئەندامانی لیژنەکان  کردووە.