سیاسی

سوودانی: خوازیاری پشتگیری زیاتری نێودەوڵەتیین

محه‌ممه‌د شیاع سوودانی، سه‌رۆك وه‌زیرانی عێراق
محه‌ممه‌د شیاع سوودانی، سه‌رۆك وه‌زیرانی عێراق
عێراق سه‌رۆك وه‌زیرانی عێراق محه‌ممه‌د شیاع سوودانی ئه‌نتۆنیۆ گۆتێرێس

K24 – هه‌ولێر:

محەممەد شیاع سوودانی سەرۆکوەزیرانی عێراق، رایده‌گه‌یه‌نێت، سەردانی ئەنتۆنیۆ گۆتێرێس سکرتێری گشتیی نەتەوەیەکگرتووەکان، بۆ وڵاتەکەی بەرز دەنرخێنێت و ئاشكرایكرد، خوازیاری پشتگیری زیاتری نێودەوڵەتیین، بۆ رووبه‌ڕوبوونه‌وه‌ی ئاڵنگارییەکانی کەشوهەوا و چارەسەرکردنی دۆسییەی ئاوارەکان.

محەمەد شیاع سوودانی لەبارەی سەردانی ئەنتۆنیۆ گوتێرێس بۆ عێراق لە هەژماری تایبەتی خۆی لە تۆڕی کۆمەڵایەتیی تویتەر نووسیویەتی: "سەردانی بەڕێز ئەنتۆنیۆ گوتێرێس بەرز دەنرخێنین و سوپاسی گوتەکانی دەکەین بۆ پشتگیریکردنی عێراق".

سوودانی سەردانەکەی گوتێرێسی بە دەرفەتێک لە قەڵەمداوە بۆ دووپاتکردنەوەی ستراتیژی خۆی لە بواری چاکسازیی و نووسیوویەتی: "سەردانەکە" بۆنەیەک بوو بۆ ئەوەی ستراتیژی خۆمان لە بواری چاکسازی و گەشەپێدان وبەرەنگاربوونەوەی گەندەڵی دووپاتبکەینەوە".

سەرۆکوەزیرانی عێراق، محەممەد شیاع سوودانی هەروەها نووسیویەتی: "خوازیاری پشتگیری زیاتری نێودەوڵەتیین بۆ رووبه‌ڕوبوونه‌وه‌ی ئاڵنگارییەکانی کەشوهەوا و چارەسەرکردنی دۆسییەی ئاوارەکان".

ئەنتۆنیۆ گۆتێرێس، سکرتێری گشتیی نەتەوەیەکگرتووەکان شەوی رابردوو گەیشتە بەغدا و رایگەیاند: هیوادارم کاتی پێویستم هەبێت بۆ ئەوەی سەردانی کەمپی ئاوارەکانی هەرێمی کوردستان بکەم.

درەنگانی شەوی رابردوو سێشەممە (28ـی شوبات/فێرێوەری 2023)، ئەنتۆنیۆ گۆتێرێس، سکرتێری گشتیی نەتەوەیەکگرتووەکان بە سەردانێکی فەرمی گەیشتە بەغدای پایتەخی عێراق و لەلایەن فوئاد حوسێن، وەزیری دەرەوەی عێراق پێشوازی لێکرا.