لە ئەمه‌ریکا هێرشێکی چەکداریی گیانلەدەستدانی چوار کەسی لێکەوتەوە
K24 – هەولێر:
لە ئاکامی هێرشێکی چەکداریی لە شاری دەیدڤیلی سەربە ویلایەتی ئالابامای ئەمه‌ریکا، چوار کەس گیانیان لەدەستدا.
بەپێی ئەو راگەیەندراوەی کە لە دامەزراوەی پۆلیسی ئالاباماوە بڵاوکراوەتەوە، کاتژمێر 22:30 شەوی شەممە لە ئاکامی هێرشێکی چەکداریی کە ئەگەری هەیە لە ئاهەنگێکی رۆژی لەدایکبووندا روویدابێت، چوار کەس گیانیان لەدەستداوە و ژمارەیەکی زۆریش برینداربوون.
فەرمانڕەوای ئالاباما، کەی ئیڤی لە پەیامێکیدا لە تویتەر رایگەیاند: "ئەم بەیانییە لەگەڵ خەڵکی دەیدڤیل و براکانم لە ئالاباما ماتەم دەگرم. تاوانە توندوتیژییەکان هیچ جێگەیەکی لە ویلایەتەکەمان نابێتەوە" و ئاماژەی بەوە کرد، کە لە نزیکەوە چاودێری دۆخەکە دەکات.
بەرپرسان، هێشتا هیچ روونکردنەوەیەکیان لەسەر ئەو رووداوه بڵاو نەکردووەتەوە کە ئایا هیچ کەس لەسەر رووداوەکە دەستگیر کراوە یاخوود نا.
