لیژنه‌ی دارایی په‌رله‌مانی عێراق به‌سه‌رۆكایه‌تی شاخه‌وان عه‌بدوڵڵا كۆبووه‌وه‌

K24 - هەولێر:

شاخه‌وان عه‌بدوڵڵا سه‌رۆكایه‌تی كۆبوونه‌وه‌ی لیژنه‌ی دارایی په‌رله‌مانی عێراق ده‌كات.

نووسینگه‌ی راگه‌یاندنی جێگری سه‌رۆكی په‌رله‌مانی عێراق، راگه‌یه‌ندراوێكی بڵاوكرده‌وه‌، تێیدا هاتووه‌: بۆ ته‌واوكردنی گفتوگۆكانی تایبه‌ت به‌ تێبینییه‌كانی ره‌شنووسی بوودجه‌ی ساڵه‌كانی 2023، 2024 و 2025ـی عێراق، شاخه‌وان عه‌بدوڵڵا جێگری سه‌رۆكی په‌رله‌مانی عێراق، سه‌رۆكایه‌تی كۆبوونه‌وه‌ی لیژنه‌ی دارایی په‌رله‌مانی عێراق ده‌كات.

رۆژی 13/3/2023، ئه‌نجوومه‌نی وه‌زیرانی عێراق، ره‌شنووسی پڕۆژه‌یاسای بودجه‌ی گشتی عێراقی په‌سه‌ندكرد، زیاتر لە 198 ترلیۆن دینارە و ئاماژە بەوەشکراوە، وەک بەشێک لە رێککەوتنی نێوان هەولێر و بەغدا، حکومەتی هەرێمی کوردستان رۆژانە دەبێت 400 هەزار بەرمیل نەوت بفرۆشێت.

پێشتریش گوتەبێژی حکومەتی هەرێمی کوردستان رایگەیاندبوو، بەرەوپێشچوون و لێکتێگەیشتنی باش لەنێوان هەولێر و بەغدا هەیە و رایگەیاند، لە میانەی سەردانەکەیدا بۆ هەولێر، مەسرور بارزانی و محەممەد شیاع سوودانی لە کەشێکی ئەرێنی رێککەوتوون لەسەر بەردەوامی کاری بەیەکەوەیی و چارەسەرکردنی کێشەکان لەسەر بنەمای دەستوور و کارنامەی پەسەندکراوی کابینەکەی سوودانی.