عەتا شێخ لەتیف: پەیامەکەی سەرۆک بارزانی لە کاتێکی هەستیار و گرنگ بوو
K24 - هەولێر:
ئەندامێکی مەکتەبی سیاسی بزووتنەوەی ئیسلامی، پەیامەکەی سەرۆک بارزانی بە گرنگ وەسفکرد بە تایبەت بۆ چارەسەرکردنی کێشەی نێوان پارتی دیموکراتی و یەکێتی نیشتیمانی.
ئەمڕۆ شەممە ( 13ــی ئایاری 2023)، عەتا شێخ لەتیف، ئەندامی مەکتەبی سیاسی بزووتنەوەی ئیسلامی، بە کوردستان24ــی راگەیاند، بزوتنەوەی ئیسلامی ئەو پەیامە لەو کاتە هەستیارەدا بە کارێکی زۆر باش وەسف دەکەن.
هەروەها راشیگەیاند، ئەو پەیامەی سەرۆک بارزانی، دەبێتە هۆی ئەوەی جارێکی دیکە گڕوتینێک بە پڕۆسەی سیاسی لە هەرێمی کوردستان بدرێتەوە.
عەتا شێخ لەتیف، گوتیشی: "ئەمڕۆ مەکتەبی سیاسی بزووتنەوەی ئیسلامی کۆبوونەوە، یەکێک لە تەوەرەکانی کۆبوونەوەکە ئەوە بوو، بە نامەیەکی فەرمی وەڵامی دەستپێشخەریەکەی سەرۆک مەسعود بارزانیمان داوەتەوە و دەستخۆشیشمان لێکردووە و بە کارێکی زۆر باشی دەزانین".
ئەو ئەندامەی مەکتەبی سیاسی بزووتنەوەی ئیسلامی، لە درێژەی قسەکانیدا، رایگەیاند، هەر لە دوای پەیامەکەی سەرۆک بارزانییەوە، هاونیشتیمانیان دڵخۆشن و چاوەڕیدەکەن بازاڕ ببووژێتەوە و هاووڵاتییان بە ئاسوودەتر بژین.
عەتا شێخ لەتیف، داوا دەکات لە هەموو لایەنە سیاسسیەکانی هەرێمی کوردستان، بەدەم پەیامەکەی سەرۆک بارزانییەوە بچن.
لەبارەی هەڵبژاردنی پەرلەمانی کوردستان، ئەو ئەندامەی مەکتەبی سیاسی بزووتنەوەی ئیسلامی، گوتی، زۆر پێویستە هەڵبژاردن لە کاتی خۆیدا بکرێت و دوانەخرێت.
رۆژی پێنجشەممە (11ـی ئایاری 2023)، سەرۆک بارزانی لەمیانی گوتارێکدا لە رێورەسمی کردنەوەی یادگەی نیشتمانیی بارزانی پەیامێکی ئاراستەی لایەنە سیاسییەکانی هەرێمی کوردستان کرد و داوای لێکردن لاپەڕەیەکی نوێ هەڵبدەنەوە و گوتی، بە دژایەتیکردنی یەکتری کەس هیچی دەستناکەوێت.
سەرۆک بارزانی لە پەیامەکەیدا، داوای لە هەردوو مەکتەبی سیاسیی پارتی و یەکێتی کرد کۆببنەو بۆ کۆتایی هێنان بە کێشەکان و ئامادەکاری بکەن بۆ کۆبوونەوەی فراوانی لایەنەکان پێش 18ـی مانگ لەپێناو گەیشتن بە رێککەوتن و لێکتێگەیشتنی هاوبەش.
دوای پەیامەکەی سەرۆک بارزانیش، هەریەکە لە سەرۆکوەزیران مەسرور بارزانی و مەکتەبی سیاسیی پارتی دیموکراتی کوردستان و زۆربەی سەرکردە و لایەنە سیاسییەکانی کوردستان پشتیوانی و ئامادەیی خۆیان بۆ جێبەجێکردنی ناوەڕۆکی پەیامەکەی سەرۆک بارزانی دەربڕی.
رۆژی (26ـی ئاداری 2023)، دڵشاد شەهاب، گوتەبێژی سەرۆکایەتی هەرێمی کوردستان لە کۆنفرانسێکی رۆژنامەوانیدا رایگەیاند: "سەرۆکی هەرێمی کوردستان بەپێی یاسای ژمارە 1ی ساڵی 2005ی هەموارکراو کە یاسای سەرۆکایەتی هەرێمی کوردستانە بە فەرمانێک رۆژی (18ـی تشرینی دووەمی 2023) بۆ ئەنجامدانی هەڵبژاردنی پەرلەمانی کوردستان دیاریکردووە".
بۆ کاراکردنەوەی کۆمیسیۆنیش، پەرلەمانی کوردستان، رۆژی 5ـی نیسانی 2023 تا رۆژی 12ـی نیسانی 2023، دەرگای خۆکاندیکردن بۆ ئەنجوومەنی کۆمیسیاران کردەوە و رۆژی (10ـی نیسانی 2023)، هاوار محەممەد، گوتەبێژی بەشی هەڵبژاردنەکانی پارتی بە کوردستان24ـی راگەیاند، دوو پۆست لە ئەنجوومەنی کۆمیسیارانی کۆمیسیۆنی باڵای هەڵبژاردن و راپرسیی هەرێمی کوردستان بە بەتاڵی ماونەتەوە و پارتی لە پشکی خۆی بەهجەت ئاڤدەل لە جێگەی جوتیار عادل بۆ ئەنجوومەنەکە کاندید کردووە.
پێشتر رێواز فایەق، سەرۆکی پەرلەمانی کوردستان رایگەیاندووە، بەپێی رێککەوتنی لایەنەکان رۆژی دەنگدان بۆ کاراکردنەوەی کۆمیسیۆن و هەمواری یاسای هەڵبژاردن لە یەک کات دەبێت.
هەروەها رۆژی (30ـی نیسانی 2023)، فراکسیۆنی پارتی دیموکراتی کوردستان لە یاداشتێکدا بۆ سەرۆکایەتی پەرلەمانی کوردستان داوایکرد، لە چەند رۆژی ئایندەدا متمانەدان بە ئەنجومەنی کۆمسیارانی کۆمیسیۆنی باڵای سەربەخۆی هەڵبژاردنەکان و راپرسی هەرێمی کوردستان بخرێتە بەرنامەی دانیشتنی پەرلەمان و بەر لە (18ـی ئایاری 2023) کە دەکاتە شەش مانگ بەر لە وادەی دیاریکراوی هەڵبژاردنی پەرلەمانی کوردستان، کۆمیسیۆنێکی کارا هەبێت و هیچ بیانوو بۆ دواخستنی هەڵبژاردن نەمێنێت.
