وه‌زاره‌تی پلاندانانی عێراق: ئەمساڵ سه‌رژمێریی گشتی ئەنجام نادرێت
K24 - هەولێر
وه‌زاره‌تی پلاندانانی عێراق له‌به‌ر چه‌ند هۆكارێك پرۆسه‌ی سه‌رژمێری گشتی دانیشتوان بۆ ساڵی داهاتوو دواده‌خات.
ماهر حه‌ماد جوهان، بریكاری وه‌زاره‌تی پلاندانانی عێراق ئاشكرایكردووه، به‌هۆی دره‌نگ په‌سه‌ندكردنی بودجه‌وه، ناتوانن ئه‌مساڵ پرۆسه‌ی سه‌رژمێری گشتیی دانیشتوان له‌كۆتایی ئه‌مساڵدا به‌ڕێوه‌ببه‌ن و كاته‌كه بۆ ساڵی داهاتوو گۆڕانكاری به‌سه‌ردا دێت.
جوهان ئاماژه‌ی به‌وه‌كردووه، دوای تەواوکردنی ئامادەکارییە تەکنیکییەکان له مانگی تشرینی یەکەمی ساڵی داهاتووی 2024 ده‌ست به پرۆسه‌كه ده‌كه‌ن كه بۆ ماوه‌ی چه‌ند مانگێك به‌رده‌وام ده‌بێت.
ده‌شڵێت، ژماره‌ی دانیشتوانی عێراق به‌پێی ئاماره سه‌ره‌تاییه‌كانی وه‌زاره‌ته‌كه‌یان گه‌یشتووه‌ته 43 ملیۆن كه‌س.
ئەمە لە کاتێدایە رۆژی یەکشەممە 7ـی ئایاری 2023، وەزارەتی تەندروستیی عێراق لە راگەیەندراوێکدا ئاماری لەدایکبوونی ساڵی 2022ـی منداڵان (بێجگە لە هەرێمی کوردستان) بڵاوکردەوە.
بەگوێرەی راگەیەندراوەکەی وەزارەتی تەندروستیی عێراق، ژمارەی ئەو منداڵانەی لە ساڵی 2022 لەو وڵاتە لەدایک بوونە، دەگاتە 903 هەزار و 16 منداڵ، کە 463 هەزار و 327ـیان کوڕن و 442 هەزار و 794ـیان کچن.
سەیف بەدر، گوته‌بێژی وه‌زاره‌تی ته‌ندروستیی عێراق ئاماژەی بەوەکرد، هاووڵاتییان بۆ پڕۆسه‌ی منداڵبوون، به رێژه‌ی له‌سه‌دا 76 نه‌خۆشخانه حكومییه‌كان، له سه‌دا 13 نه‌خۆشخانه تایبه‌ته‌كان و له‌سه‌دا 1.3 بنكه ته‌ندروستییه‌كانیان به‌كارهێناوه.
گوته‌بێژی وه‌زاره‌تی ته‌ندروستیی عێراق روونیشیکردەوە، لەو ژمارەیە، 512 هەزار و 746 منداڵ به‌شێوه‌ی سرووشتی و 390 هەزار و 270 منداڵ له رێگه‌ی ئەنجامدانی نەشتەرگەرییەوە لەدایک بوونە.
هاوکات بەگوێرەی داتاکانی بەشی ئاماری وەزارەتی تەندروستیی حکومەتی هەرێمی کوردستان، کە کۆپییەکی بۆ کوردستان24 نێردراوە، لە ساڵی 2022، 160 هەزار و 843 هەزار منداڵ لەناوخۆی هەرێمی کوردستان، لە نەخۆشخانە حکومی و ناحکومییەکان لەدایک بوونە.
بەگوێرەی داتاکانی وەزارەتی تەندروستیی حکومەتی هەرێم، لەو ژمارەیەی ئاماژەی پێکراوە، 81 هەزار و 966ـیان کوڕن و 78 هەزار و 877ـیان کچ.