ئەوروپا و ئەمەریکا داوای راگرتنی گرژیەکانی باکووری کۆسۆڤۆ دەکەن
K24 - هەولێر
نوێنەری یەکێتی ئەوروپا بۆ باڵکانی رۆژئاوا، میرۆسلاڤ لایچاک و یاریدەدەری وەزیری دەرەوەی ئەمەریکا بۆ کاروباری ئەوروپا، گابرێل ئێسکۆبار لەگەڵ سەرۆک وەزیرانی کۆسۆڤۆ ئەلبین کورتی گفتوگۆیان کرد.
دیپلۆماتکارانی ئەوروپا و ئەمەریکا لە میانەی کۆبوونەوەکەی ئەمڕۆدا لە پریستینا، نیگەرانی خۆیان دەربڕی سەبارەت بە بارودۆخی ناوچەکە و داوای کۆتاییهێنانێکی دەستبەجێیان کرد بە گرژییەکان لە باکوری کۆماری کۆسۆڤۆ.
لایچاک لە تویتێکدا نووسیویەتی: " نێردەی ئەمەریکا گابرێل ئێسکۆبار و ئێمە لەگەڵ سەرۆک وەزیران ئەلبین کورت و جێگری سەرۆک وەزیران پێسنیک بێسڵیمی کۆبووینەوە، ئێمە زۆر نیگەرانین سەبارەت بە بارودۆخی باکووری کۆسۆڤۆ و داوای کەمکردنەوەی دەستبەجێی گرژییەکان دەکەین و داوای هەڵبژاردنی پێشوەختە، لە شارەوانییەکانی باکوری کۆسۆڤۆ دەکەین لەگەڵ بەشداریکردنی سربیای کۆسۆڤۆ و گەڕانەوە بۆ دیالۆگ و ئاساییکردنەوەی گرژیەکان".
چاوەڕوان دەکرێت لایچاک و ئێسکۆبار ئەمڕۆ سێشەممە، بەردەوام بن لە سەردانەکەیان بۆ ناوچەکە و لە بێلگراد لەگەڵ سەرکردایەتی سربیا گفتوگۆ دەکەن.
