یاریدەدەری وەزیری گەنجینەی ئەمەریکا گەیشتە عێراق

K24 – هەولێر:

باڵیۆزی ئەمەریکا لە عێراق، گەیشتنی یاریدەدەری وەزیری گەنجینەی ئەمەریکای بۆ بەغدا راگەیاند و ئاشکرایکرد، لەگەڵ بەرپرسانی حکومەتی فیدراڵی و بانکی ناوەندیی عێراق کۆبوونەوەی گرنگ ئەنجام دەدات.

رۆژی سێشەممە (12ـی ئەیلوولی 2023)، ئەلینا رۆمانۆوسکی، باڵیۆزی ئەمەریکا لە عێراق لە پەیامێکدا لە تۆڕی کۆمەڵایەتی ئێکس (تویتەری پێشوو)، گەیشتنی ئێلیزابێس رۆزنبێرگ، یاریدەدەری وەزیری گەنجینەی ئەمەریکای بۆ بەغدا راگەیاند.

ئەلینا رۆمانۆوسکی ئاماژەی بەوەکردووە، ئێلیزابێس رۆزنبێرگ لەگەڵ بەرپرسانی باڵای حکومەت و بانکی ناوەندیی عێراق کۆدەبێتەوە.

لەبارەی ئامانجی سەردانەکەی ئەو بەرپرسە ئەمەریکییە بۆ عێراق، ئەلینا رۆمانۆوسکی رایەگەیاندووە، سەردانی ئێلیزابێس رۆزنبێرگ، هاوکاردەبێت لە پێشکەوتنی هەوڵەکانی بەرەنگاربوونەوەی سپیکردنەوەی پارە و چاکسازی بانکی و بەرەنگاربوونەوەی گەندەڵی و پشتگیریکردن لە وەبەرهێنانی نێودەوڵەتی لە عێراق.

رۆژی (19ـی تەمموزی 2023)، رۆژنامه‌ی وۆڵ ستریت جۆرناڵی ئه‌مه‌ریكی له‌ راپۆرتێكدا ئاماژەی بەوەکرد، ئه‌مه‌ریكا مامه‌ڵه‌كردن به‌ دۆلار له‌ 14 بانكی عێراقیی قه‌ده‌غه‌كردووه‌ و له‌ راپۆرته‌كه‌دا لە بەرپرسانی ئیدارەی واشنتنی گواستووەتەوە، ئه‌و سزایانه‌ی وه‌زاره‌تی گه‌نجینه‌ی ئه‌مه‌ریكا و بانكی فیدراڵ له‌ نیویۆرك، له‌ چوارچێوه‌ی هه‌ڵمه‌تێكی گشتگیردایه‌ بۆ رێگریكردن له‌ ئاڵوگۆڕکردنی دۆلار لەگەڵ ئێران.

ئەو 14 بانکەی سزادراون بریتی بوون لە (بانکی ئەلموستەشاری ئیسلامی بۆ وەبەرهێنان و پارەدارکردن، بانکی قڕتاسی ئیسلامی بۆ وەبەرهێنان و پاردارکردن، بانکی تەیفی ئیسلامی، بانکی ئیلافی ئیسلامی، بانکی ئەربیل بۆ وەبەرهێنان و پارەدارکردن، بانکی ئیسلامی نێودەوڵەتی، بانکی عەبر عێراق، بانکی موسڵ بۆ گەشەپێدان و وەبەرهێنان، بانکی راجحی ئیسلامی، بانکی سومەری بازرگانی، بانکی سیقەی نێودەوڵەتی ئیسلامی، بانکی ئەوری ئیسلامی، بانکی جیهانی ئەلعالەمی ئیسلامی بۆ وەبەرهێنان و پارەدارکردن، بانکی زین عێراق ئیسلامی بۆ وەبەرهێنان و پارەدارکردن).

هەروەها رۆژی (6ـی تشرینی دووەمی 2022)، بانکی ناوەندیی عێراق پێدانی دۆلاری بە چوار بانک راگرت بە مەبەستی وردبینکردن لە مامەڵەکانیان، بانکەکانیش بریتی بوون لە" بانکی ئەنساریی ئیسلامی بۆ وەبەرهێنان و پارەدارکردن، بانکی قابزی ئیسلامی بۆ پارەدارکردن و وەبەرهێنان، بانکی ئاسیای عێراقی ئیسلامی بۆ وەبەرهێنان و پارەدارکردن، بانکی رۆژهەڵاتی ناوەڕاست بۆ وەبەرهێنان".

لە ماوەی نزیکەی دوو ساڵی رابردوودا، نرخی 100 دۆلار لەنێوان 148 ھەزار بۆ 149 ھەزار دینار بوو، بەڵام رۆژی 11/12/2022ـەوە نرخی 100 دۆلاری ئەمەریکی 150 ھەزار دیناری عێراقی تێپەڕاند و دواتر بۆ یەکەمجار 100 دۆلاری ئەمەریکی 166 ھەزار دیناری عێراقی تێپەڕاند و تائێستا بەھای دینار ھەر بە ناجێگیری ماوەتەوە.

رۆژی هه‌ینی (3ـی شوباتی 2023)، عه‌لی موحسین ئیسماعیل، پارێزگاری بانكی ناوه‌ندیی عێراق و براین نیلسۆن، یاریده‌ده‌ری وه‌زیری گه‌نجینه‌ی ئه‌مه‌ریكا بۆ كاروباری تیرۆر و هه‌واڵگری داراییكۆبوونه‌وه‌ و تاوتوێی دۆخی ئابووری و به‌رزو نزمی به‌های دراویان كرد و هه‌ردوولا جه‌ختیان له‌سه‌ر گرنگی سه‌قامگیری ئابووری عێراق كرده‌وه‌. به‌گوێره‌ی رایگه‌یه‌ندراوی بانكی ناوه‌ندی عێراق، وەزارەتی گەنجینەی ئەمریکا پشتیوانی خۆیی بۆ بەدیهێنانی سەقامگیریی ئابووری لەعیراق دووپاتکردووەتەوە و ئاماژەیداوە، کە ئامادەن نەرمی بنوێنن لە پێناو گەیشتن بە ئامانجە هاوبەشەکان، هەروەها رێککەوتوون لە هەماهەنگی هاوکارییەکانی نێوانیان بەردەوام بن.

دوای ئەو کۆبوونەوەیەش، شاندێکی دیکەی حکومەتی عێراق و بانکی ناوەندیی عێراق لە هەمان مانگدا، سەردانی واشنتنیان کرد و لەگەڵ بەرپرسانی وەزارەتی گەنجینەی ئەمەریکا لەبارەی پرسی دۆلارەوە کۆبوونەوە و گەیشتنە لێکتێگەیشتنی هاوبەش لە چەند پرسێکی تایبەت بە ئاڵوگۆڕی دراو و رێگریکردن لە چوونە دەرەوەی دۆلار لە عێراق.