پسپۆڕانی ژینگەیی لەبارەی ژینگەی چەند پارێزگایەکی عێراق هۆشداری دەدەن
K24 - هەولێر
پسپۆڕانی کاروباری ژینگەیی هۆشداری دەدەن لە پیسبوونی زیاتری ژینگە بەهۆی ماددە کیمیاییەکان و گۆگرد و میسان، لە ئەنجامی بەردەوامبوونی سووتانی گازی پەیوەندیدار، کە بووەتە هۆی بەرزبوونەوەی رێژەی شێرپەنجە و نەخۆشییەکانی پێست و هەناسەدان کە لەلایەن بەشە تەندروستییەکانەوە تۆمارکراون بەتایبەتی لە پارێزگاکانی باشور، وەک بەسرە و زی قار و میسان و موسەنا.
شارەزای کاروباری ژینگە، محەمەد کامیل زوهێر، بە رۆژنامەی سەباح راگەیاند، پرۆسەی سوتاندنی گاز لە هەوادا بەردەوام دەبێت تا ئەو کاتەی دەچێتە خولی پێنجەمی مۆڵەتپێدان کە لەلایەن وەزارەتی نەوتەوە ئامادەکراوە.
ئاماژەی بەوەشکردووە، بەرنامەی حکومەتی سەرۆکوەزیران محەمەد شیعاع سوودانی بۆ جەختکردنەوە لەسەر وەبەرهێنانی بڕی گازی سووتاو لە کێڵگە نەوتییەکاندا هاتووە، بۆ بەدەستهێنانی زۆرترین سوود و کەمکردنەوەی رێژەی بەفیڕۆدان و پیسبوونی ئەم سامانە گرنگە.
دەشڵێت: کۆمپانیا پێشکەوتووەکانی ئەم بوارە، بەتایبەتی کۆمپانیای زەبەلاحی فەڕەنسی تۆتال ئینێرجی، بە بەکارهێنانی تەکنەلۆژیای پێشکەوتووی دۆستی ژینگە، وەبەرهێنانی گەورەیان لە سوود وەرگرتن لە گازی پەیوەندیدار کردووە.
لە کۆبوونەوەیەکی ئەم دواییەدا کە پسپۆڕان و لایەنە پەیوەندیدارەکانی حکومەت لەگەڵ ژمارەیەک لە نوێنەرانی بەسرە کۆبوونەوە بۆ گفتوگۆکردن لەسەر مەترسییەکانی پیسبوونی ژینگە کە چەندین ساڵە بەربڵاوە، گەیشتووەتە ئەو ئەنجامەی کە لە نێوان 35 بۆ 40 لە سەدا، گازی پەیوەندیدار لە ئاسمانی پارێزگای بەسرە و ناوچەکانی باشووری وڵاتەکە وەک ناسریە و میسان سووتاوە.
یوسف سەوادی بەڕێوەبەری بەشی ژینگە لە پارێزگای موسەنا بەهەمان سەرچاوە گوت: وەزارەتی ژینگە ژمارەیەک رێوشوێنی یاسایی جێبەجێ دەکات بۆ ئەوەی ئەو کۆمپانیایانە بەرپرسیار بکات، کە پابەند نین بە ستانداردە ژینگەییەکانەوە، جگە لە چاودێریکردنی پێشێلکارییە ژینگەییەکان کە بەهۆی چالاکییە پیشەسازییە جۆراوجۆرەکانەوە دروست دەبن.
گوتیشی: بەشەکە چەندین رێوشوێن جێبەجێ دەکات بە هەماهەنگی لەگەڵ وەزارەتی پاراستن و چاککردنی ژینگە لە باشوور، کە ئێمە ئاگادارکردنەوەیەک بۆ قەوارەی پیشەسازی یان دامەزراوە پێشێلکەرەکان دەردەکەین و پاشان ئێمە پشت بە پرۆسەی سەپاندنی قەرەبوو یان تۆمارکردنی سکاڵای یاسایی دژی کۆمپانیاکان و لایەنە پێشێلکارەکان دەکەین، تا ئەو کاتەی چارەسەرەکان دەدۆزرێنەوە.
ئامارەکان ئاماژە بەوە دەکەن کە ساڵانە زیاتر لە دوو هەزار حاڵەتی شێرپەنجە لە پارێزگای بەسرە تۆمار دەکرێت، جگە لە نزیکەی 20 هەزار حاڵەتی نەخۆشی گورچیلە و ژمارەی هاوشێوە کە لەلایەن بەرپرسانی فەرمییەوە تۆمارکراون بۆ نەخۆشییەکانی دیکە.
