هاتووچۆی هەولێر: سەرجەم کامێراکانی خاڵ بۆ خاڵ لە شەقامی 150 مەتری بەکاردەخرێن
K24 – هەولێر
بەڕێوەبەرایەتی هاتووچۆی هەولێر رایگەیاند، سەرجەم کامێراکانی خاڵ بۆ خاڵ لە شەقامی 150 مەتری دەخرێنەکار و سەرپێچی تۆمار دەکەن.
لە راگەیەندراوێکدا هاتووچۆی هەولێر شوفێران ئاگادار دەکاتەوە: "بە مەبەستی بەرزکردنەوەی ئاستی سەلامەتی لەسەر رێگاوبانەکان و پابەندکردنی شوفێران بە رۆیشتن بە خێرایی دیاریکراو لەسەر شەقام و رێگاوبانەکان، لە ئەمڕۆ 2023/10/26 تاکو 2023/11/2 کاتژمێر 12ی شەو، سەرجەم کامێراکانی خاڵ بۆ خاڵ-ی چاودێری خێرایی لەسەر شەقامی 150 مەتری خێرا بەکاردەخرێت، وەکو تاقیکردنەوە، لە دوای ئەو بەروارە دەستدەکەن بە تۆمارکردنی سەرپێچی تیژڕۆیی".
هاتووچۆی هەولێر داواش لە شوفێران دەکات: "بۆ پاراستنی خۆتان و ئازیزانتان و سەروماڵتان، پابەندی رۆیشتن بن بەوخێراییەی کە بە هێماکانی هاتووچۆ دیاریکراوە".
ئەمە لە کاتێکدایە لە شەوی 21ی ئەم مانگە سەرجەم کامێراکانی خاڵ بۆ خاڵ لە شەقامی 120 مەتری هەولێر بەکارخران، زۆرترین خێرایی110 یە، بۆ ئۆتۆمبێلی بچووک، بۆ بارهەڵگریش خێراییەکەی 80ـە لەو شەقامە.
دوێنێ بەڕێوەبەرایەتیی گشتیی هاتووچۆی هەولێر رایگەیاند، لــە رۆژی چـوارشەممەوە، 25-10-2023 تاوەکو رۆژی چوارشەممەی داهاتوو، 1-11-2023، سەرجەم کامێراکانی خاڵ بۆ خاڵ بە درێژایی رێگەی هەولێر - پیرمام لە بازگەی هەولێر تاوەکو پشت تونێلی پیرمام وەکو 'تاقیکردنەوە' بەکاردەخرێن.
