سه‌رۆكوه‌زیران مه‌سرور بارزانی پێشوازی لە باڵیۆزی نوێی کەنەدا لە عێراق دەکات
K24 - هه‌ولێر:
ئەمڕۆ چوارشەممە 11/1، سه‌رۆكوه‌زیران مەسرور بارزانی، پێشوازی لە کاتی بونکا باڵیۆزی نوێی کەنەدا لە عێراق کرد.
سه‌رۆكوه‌زیران مه‌سرور بارزانی وێڕای پیرۆزبایی بەبۆنەی دەستبەکاربوونی، هیوای سەرکەوتنی بۆ خواست لە ئەرکەکەیدا و هەموو پشتیوانییەکی دەربڕی لە پێناو بەرەوپێشبردنی پەیوەندییەکانی کەنەدا و هەرێمی کوردستان.
باڵیۆزی کەنەدا، خواستی وڵاتەکەی بۆ پەرەپێدانی پەیوەندییەکان لەگەڵ هەرێمی کوردستان بەتایبەتی لە بوارەکانی وەبەرهێنان و ئاڵوگۆڕی بازرگانی و کولتووری دەربڕی.
گرنگیی دابینکردنی مافە دەستوورییەکانی هەرێمی کوردستان و گرنگیی بەهێزکردنی سیستەمی فیدراڵیی عێراق و ڕووبەڕووبوونەوەی کاریگەرییە نەرێنییەکانی گۆڕانی کەشوهەوا و سوودوەرگرتن لە ئەزموونی کەنەدا لەم بوارەدا، چەند تەوەرێکی دیکەی گفتوگۆکانی دیدارەکە بوون.
