سه‌در به‌ریبوونی خۆی له‌و كاندیدانه‌ی ره‌وته‌كه‌ی راگه‌یاند كه له هه‌ڵبژاردنی ئه‌نجوومه‌نی پارێزگاكان ناكشێنه‌وه
K24 – هەولێر:
نووسینگه‌ی تایبه‌تی سه‌رۆكی ره‌وتی سه‌در به‌ریبوونی خۆی له‌و كاندیدانه‌ی ناو ره‌وته‌كه راگه‌یاند كه ره‌تیان كردووه‌ته‌وه له پڕۆسه‌ی هه‌ڵبژاردنی ئه‌نجوومه‌نی پارێزگاكانی عێراق بكشێنه‌وه.
ئه‌مڕۆ (پێنجشه‌ممه 14ـی كانوونی یه‌كه‌می 2013) نووسینگه‌ی تایبه‌تی موقته‌دا سه‌در، سه‌رۆكی ره‌وتی سه‌در به‌ریبوونی خۆی له‌و كاندیدانه‌ی ناو ره‌وته‌كه راگه‌یاند، كه ره‌تیان كردووه‌ته‌وه له پڕۆسه‌ی هه‌ڵبژاردنی ئه‌نجوومه‌نی پارێزگاكانی عێراق بكشێنه‌وه.
نووسینگه‌ی تایبه‌تی ره‌وتی سه‌در رایگه‌یاندووه "پشتبه‌ست به رێبازی موقته‌دا سه‌در له رووبه‌ڕووبوونه‌وه و دژایه‌تیكردنی گه‌نده‌ڵی و گه‌نده‌ڵكاران و هه‌ڵوێستی ئاشكرای سه‌باره‌ت به بایكۆتكردنی پڕۆسه‌ی گه‌نده‌ڵی هه‌ڵبژاردنی ئه‌نجوومه‌نی پارێزگاكان، به‌ریبوونی خۆمان له‌و كاندیدانه راده‌گه‌یه‌نین كه ره‌تیان كردووه‌ته‌وه له پڕۆسه‌ی هه‌ڵبژاردنه‌كان بكشێنه‌وه."
رۆژی (چوارشه‌ممه 13ـی كانوونی یه‌كه‌می 2013) موقته‌دا سه‌در، سه‌رۆكی ره‌وتی سه‌در له په‌یامێكدا كه له تۆڕی (ئێكس) بڵاویكردووه‌ته‌وه، ركابه‌ره‌كانی به ده‌ستپیس و گه‌نده‌ڵ و هه‌ڵبژاردنی ئه‌نجوومه‌نی پارێزگاكانیش به گاڵته‌جاڕی ناوده‌بات و ده‌ڵێت، ئه‌وان خراپه‌كار و گه‌نده‌ڵن و "خوا گه‌نده‌ڵكاران و خراپه‌كارانی خۆش ناوێت".
سه‌رۆكی ره‌وتی سه‌در هه‌روه‌ها داوا له لایه‌نگران و عێراقییه‌كان ده‌كات خۆیان پاك رابگرن و له "هه‌ڵبژاردنی گه‌نده‌ڵكاران" دوور بكه‌ونه‌وه و هێرش نه‌كه‌نه سه‌ر هه‌ڵبژاردنه‌كه‌یان و ئاسایش و سه‌قامگیری و رێز و شكۆی عێراق بپارێزن.
لە 13ـی تشرینی دووەمی 2023، موقتەدا سەدر لە پەیامێکدا، داوای لە لایەنگرانی کرد بایکۆتی هەڵبژاردنی ئەنجوومەنی پارێزگاکانی عێراق بکەن و ئاماژەی بەوەکرد، "بەشدارینەکردنتان لە شەرعییەتی هەڵبژاردنەکە لە ناوخۆ و دەرەوەی وڵات کەمدەکاتەوە".
ئەم هەڵبژاردنەش دەبێتە یەکەم هەڵبژاردن لە ماوەی 20 ساڵی رابردوو لە عێراقدا، کە رەوتی سەدر بایکۆتی بکات و بانگەشەی بەشدارینەکردن لە پرۆسەی دەنگدان لە لایەنگران و دەنگدەران بکات.
