شەش سەربازی تورکیا کوژران
K24 – هەولێر
وەزارەتی بەرگریی تورکیا کوژرانی شەش سەربازی لە شەڕی پەکەکە راگەیاند.
وەزارەتی بەرگریی تورکیا لە راگەیەندراوێکدا ئاماژەی بەوەداوە "رۆژی 23ی کانوونی یەکەمی 2023، لە ناوچەی ئۆپەراسیۆنی چنگ-قفڵ لە ئەنجامی رووبەڕووبوونەوە لەگەڵ چەکدارانی پەکەکە، کە هەوڵیان دەدا دزە بکەنە ناوچەی بنکەیەکی سەربازییمان، شەش سەرباز کوژران و یەکێکی دیکەش برینداربوو".
راشیگەیاندووە، لەو رووبەڕووبوونەوەیەدا 13 چەکداری پەکەکە کوژراون و شەڕ و رووبەڕووبوونەوە لە ناوچەکە بەردەوامە.
لە راگەیەندراوێکی دیکەدا وەزارەتی بەرگریی تورکیا رایگەیاندبوو، کە 29 ئەشکەوت و حەشارگەی پەکەکەیان کردووەتە ئامانج.
بەگوێرەی زانیارییەکانی پەیامنێری کوردستان24، شەوی رابردوو لە سنووری ناوچەی شیلادزێ شەڕ و رووبەڕووبوونەوەی سەخت لەنێوان سوپای تورکیا و چەکدارانی پەکەکە روویداوە.
