بریندارانی شەڕی داعش خەڵات دەكرێن

K24 - سۆران

لە مەراسیمێكدا لە ھۆڵی بوونەكانی سۆران 150 پێشمەرگەی برینداربووی شەڕی داعش خەڵات كران.

پەیامنێری (كوردستان24) لە سۆران رایگەیاند: "رێكخراوی ئەنفالی بارزانییەكان 150 پێشمەرگەی خەڵاتكرد كە لە شەڕی دژی داعش برینداربوونە".

یەكێك لەو پێشمەرگە بریندارانە بە ناوی مامەند حوسێن، بە (كوردستان24)ی گوت: "پێشمەرگەم لە یەكەی 124 ی سەر بە یەكەكانی 70ی ھێزی پێشمەرگە، لە 10/1/2015، لە سنووری داقوق برینداربووم، ئێستا بەھۆی برینداربوونمەوە ئازارم زۆرە".

ھەندێك لەو پێشمەرگانە گلەییان لە وەزارەتی پێشمەرگە ھەیە پێیانوایە وەك پێویست ئاوڕیان لێنەداونەتەوە، پێشمەرگەیەك كە لە شەڕی دژی داعش برینداربووە دەڵێ: "ئێمە كۆمەڵێك بریندارین پێویستمان بە چارەسەرە لە دەرەوەی وڵات، بەڵام لە لایەن وەزارەتی پێشمەرگە پەراوێز خراوین".

گوتیشی: "جەنابی سەرۆك، خۆی پێشمەرگەیە و مەعاناتی پێشمەرگە دەزانێت، بۆیە داوای لێدەكەین ھاوكاری ئەو پێشمەرگە بریندارانە بكات كە پێویستیان بە چارەسەرە لە دەرەوەی وڵات، ھەروەھا دەستخۆشی لە رێكخراوی ئەنفالی بارزانییەكان دەكەم كە ئێمەیان بیرەو خەڵاتمان دەكەن".