نه‌جوا حه‌مید كاكه‌یی: هەوڵەکانی دژایەتیکردنی ئاڵای کوردستانمان له كه‌ركووك لەناوبرد
K24- هه‌ولێر:
نه‌جوا حه‌مید كاكه‌یی په‌رله‌مانتاری كورد له به‌غدا، وێنه‌ی خۆی و وه‌زیری په‌روه‌رده‌ی فێدراڵی له فه‌یسبووكی خۆی بڵاوكردووه‌ته‌وه و ده‌ڵێت: "دوای ئه‌وه‌ی به‌ڕێوه‌به‌ری په‌روه‌رده‌ی كه‌ركووك بڕیاری لابردنی ئاڵای كوردستان له‌سه‌ر قوتابخانه‌كانی ئه‌و شاره ده‌ركرد، پەیوەندیمان بە جەنابی وەزیری پەروەردەی عێراقەوە کرد و به سوپاسه‌وه بریاره‌كه‌ی هه‌ڵوه‌شانده‌وه".
له هه‌ژماری تایبه‌تی خۆی له تۆڕی كۆمه‌ڵایه‌تی فه‌یسبووك، نه‌جوا حه‌مید كاكه‌یی په‌رله‌مانتاری كورد له په‌رله‌مانی عێراق نووسیوویه‌تی: "دوای ئەوەی بەڕێوەبەری پەروەردەی کەرکووک بڕیاریدا تەنیا ئاڵای عێراق لەسەر قوتابخانەکانی کەرکووک بەرزبکرێتەوە، پەیوەندیمان بە جەنابی وەزیری پەروەردەی عێراقەوە کرد و بەڕێزیان بە سوپاسەوە رێزی لە داواکەمان و لە ئاڵای پیرۆزی کوردستان گرت و رەزامەندی دەربڕی لەسەر دووبارە هەڵکردنی ئاڵای کوردستان لەسەر باڵه‌خانه‌ی قوتابخانەکانی خوێندنی کوردی لە کەرکووک".
كاكه‌یی هه‌روه‌ها نووسیوویه‌تی: "بە ئەرکی خۆمانی دەزانین داکۆکی لە مافە نەتەوەییەکانمان بكه‌ین، لە سەرووی هەموویانەوە ئاڵای پیرۆزی کوردستان، تاکو هەمیشە لە شاری کەرکووک رەمزی کوردایەتی شه‌كاوه بێت".
دواجار ده‌ڵێت: "هەوڵەکانی دژایەتیکردنی ئاڵای پیرۆزی کوردستانمان لەناوبرد و دووبارە ئاڵای كوردستان لەسەر قوتابخانەکانی خوێندنی کوردی له كه‌ركووك دەشەکێتەوە".