سەرکردەیەکی سیاسیی حەماس: زانیاریمان لە سەر چارەنووسی بارمتە ئیسرائیلییەکان نییە
K24 - هەولێر
سەرکردەیەکی سیاسیی بزووتنەوەی حەماس ئاشكرایکرد، بزووتنەوەکە هیچ زانیارییەکی لە سەر چارەنووسی زیندوو مانەوە یان گیان لەدەستدانی بارمتە ئیسرائیلییەکان نییە.
باسم نەعیم سەرکردەی باڵی سیاسیی حەماس لە قاهیرە بە ئاژانسی فرانس پرێسی فەرەنسی راگەیاندووە، بە دروستی نازانین چەند کەس لە بارمتەکان زیندووماون و چەندیشیان بەهۆی بۆردومانەکان یان بەهۆی برسێتییەوە گیانیان لەدەستداوە، چونکە ژمارەی زۆرە و لە چەند شوێنێکی جیاواز دەستبەسەرکراون.
لێدوانەکەی باسم نەعیم، سەرکردەی سیاسیی حەماس لە کاتێکدایە، وڵاتانی نێوەندگیری (میسر، قەتەر و ئەمەریکا) لە قاهیرە هەوڵەکانیان چڕکردووەتەوە بۆ ئەوەی بەر لە مانگی رەمەزان ئاگربەست لە نێوان حەماس و سوپای ئیسرائیل رابگەیەندرێت.
هەروەها حکومەتی ئیسرائیل ئازادکردنی تەواوی رفێندراوەکانی دەستی چەکدارانی حەماسی کردووەتە مەرجێکی دانووستانەکانی قاهیرەو راشیگەیاندووە، هۆکاری نەچوونی شاندی دانووستانکاریان بۆ میسر ئەوەی حەماسە هێشتا لیستی ناو و زانیاریی لە سەر ئەو 130 بارمتەی لە دەستی چەکدارانی حەماس ماون، بەدەستەوە نەداوە.
چەکدارانی حەماس داوای ئاگربەستی تەواوەتی و کشانەوەی سوپای ئیسرائیل لە کەرتی غەززە دەکەن، بەر لە رێککەوتن لە سەر ئازادکردنی بارمتەکان.
لەمبارەوە باسم نەعیم سەرکردەی باڵی سیاسیی حەماس رایگەیاندووە، پێویستە ئاگربەست بکرێت بۆ ئەوەی داواکاری زانیاریی تەواو لەبارەی ژمارە و دۆخی تەندروستی بارمتەکان بەدەستەوە بدرێت.
رۆژی 7ی ئۆکتۆبەری 2023 ، چەکدارانی بزووتنەوەی حەماس هێرشیانکردە سەر ئیسرائیل، بەهۆیەوە زیاتر لە 1160 ئیسرائیلی کوژران، لە نێویاندا 700 کەسیان مەدەنی بوون، کە 36 لە قوربانییەکان منداڵ و 70 کەسی دیکەشیان خەڵکی بیانی بوون.
هەروەها 250 کەسیان بە بارمتە رفاند، لە کۆتاییەکانی تشرینی یەکەمی 2023 بە نێوەندگیری قەتەر و میسر و ئەمەریکا ئاگربەستێکی کاتی بۆ هەفتەیەک راگەیەندراو زیاتر لە 100 بارمتەی ئیسرائیلی بەرانبەر بە 240 زیندانی فەڵەستنی ئازادکران، بە گوێرەی ئامارێکی نووسینگەی سەرۆکوەزیرانی ئیسرائیل تاوەکو ئێستا 132 رفێندراو لە ژێر دەستی چەکدارانی حەماس ماون و بە گوێرەی راگەیەندنەکانی حەماسیش لانیکەم 29 کەس لە رفێندراوەکان بەهۆی هێرشەکانی سەر کەرتی غەززە کوژراون.
شەڕی حەماس و سوپای ئیسرائیل نزیکەی پێنج مانگە بەردەوامە و بەگوێرەی ئاماری وەزارەتی تەندروستی فەڵەستین لە کەرتی غەززە له ده‌ستپێكی شەڕەوە تاوەکوو ئێستا زیاتر لە 30410 كه‌س لەو کەرتە کوژراون و زیاتر لە 71700 كه‌سی دیکەش برینداربوون.