کارزان هادی: بڕیارەکانی سەرۆکوەزیران کاریگەریی لەسەر بووژاندنەوەی بازاڕ دەبێت

K24 - هەولێر

سەرۆکی شارەوانیی هەولێر ڕایگەیاند، بڕیارەکەی سەرۆکوەزیرانی هەرێمی کوردستان، کرێی کۆن و تازە دەگرێتەوە.

ئەمڕۆ شەممە، 30ـی ئاداری 2024، کارزان هادی، سەرۆکی شارەوانیی هەولێر لە میانی گەشتێکی هەواڵی کوردستان24 ڕایگەیاند، لە دواین کۆبوونەوەی ئەنجوومەنی وەزیران تایبەت بە بڕیارەکانی سەرۆکوەزیرانی هەرێمی کوردستان، دوو بڕیاریان پەیوەست بوون بە سەرۆکایەتیی شارەوانیمان،  بڕیارەکانی لێخۆشبوونی 20% بوو لە کرێگرتەکانی شارەوانی.

بەگوتەی ئەو، "ئەو بڕیارە تەنیا کرێ ناگرێتەوە، بەڵکو هەموو ڕسووماتەکان دەگرێتەوە، خۆڵ و خاشاکە، ڕسووماتی تابلۆیە، ڕسووماتی پیشەیە، هەروەها کرێشە."

کارزان هادی دەشڵێت: "ئەو کرێیە هی ئێستا و ئایندە نییە بە تەنها، بەڵکو کرێی کەڵەکەبووی ساڵانی ڕابردووش دەگرێتەوە، بەدڵنیاییەوە دەرکردنی ئەم بڕیارانە کاریگەرییەکی زۆری دەبێت لەسەر بووژاندنەوەی بازاڕ،  کاروباری کاسبکاران و چینی کەمدەرامەت و پیشەوەراندا."

ڕاشیگەیاند، لە ڕابردووشدا، دووجار لە کابینەی نۆیەمدا داشکان بۆ هاووڵاتییان کراوە، بەڵام ئەوان بەڕێژەی 15% بووە، هی ئەمجارە 20% کە بڕیاری لێخۆشبوونی بۆ دەرکراوە.

ڕۆژی چوارشەممە (27ـی ئاداری 2024) مەسرور بارزانی، سەرۆکی حکوومەتی هەرێمی کوردستان ڕایگەیاند: بڕیارمان دا بە دابەشکردنی مووچەی مانگی دوو و وەزارەتی داراییم ڕاسپاردووە، دەست بە دابەشکردنی مووچەی مانگی دوو بکەن و ئامادەکاریش بکەن بۆ دابینکردنی مووچەی مانگی سێ و مانگەکانی داهاتووش.

هەروەها سەرۆکی حکوومەتی هەرێمی کوردستان چەند بڕیارێکی دیکەی لە بەرژەوەندیی خەڵکی کوردستان کە لە کۆبوونەوەی ئەمڕۆی ئەنجوومەنی وەزیران بڕیاریان لەبارەیەوە دراوە بۆ دۆخی ناهەمواری ئابووریی سەر شانی خەڵکی هەرێمی کوردستان سووک بکات؛ یەکێک لە بڕیارەکانیش دابەشکردنی زەوییە و لەو بارەیەوە، سەرۆکوەزیران مەسرور بارزانی ڕایگەیاند: بڕیارماندا وەزارەتی شارەوانی و گەشتوگوزار دەست بکات بە تەرخانکردن و دابەشکردنی زەوی بەسەر هەموو ئەو فەرمانبەرانەی کە تاوەکو ئێستا لە حکوومەت سوودمەند نەبوون.

هاوکات سەرۆکوەزیران مەسرور بارزانی لە لێدوانە ڕۆژنامەوانییەکەیدا، چەند بڕیارێکی دیکەی ڕاگەیاند و ئاماژەی بەوە کرد، سەرجەم وەزارەتە پەیوەندیدارەکانیان ڕاسپاردووە بۆ جێبەجێکردنی ئەو بڕیارانە، لەوانەش:

داشکاندن لە پارەی کەڵەکەبووی کارەبا بە ڕێژەی 20%.

داشکاندنی 20% لە سزای کەڵەکەبووی مرور (هاتووچۆ).

داشکاندنی 50% لە ڕسووماتی هێنانی گۆشت

داشکاندنی 20% لە کرێی خوێندنی پارالێل لە زانکۆ و پەیمانگە حکومییەکان.

لێخۆشبوونی سزا لە دواکەوتنی بەشداریی دەستەبەریی کۆمەڵایەتی.

داشکاندنی ڕسووماتی کەڵەکەبووی ئاو بە ڕێژەی 20%.

داشکاندنی ڕسووماتی شارەوانی بەتایبەت کرێی کرێچییەکانی وەزارەتی شارەوانی بە ڕێژەی 20%.

لێخۆشبوون لە سزای دواکەوتنی باج لەلایەن پیشەوەران، کاسبکاران و کەمدەرامەتان.

لە کۆتایی لێدوانەکەیدا، سەرۆکی حکوومەتی هەرێمی کوردستان ئاماژەی بەوەش کرد: "هیوادارم ئەم هەنگاوانە و ئەم بڕیارانە بتوانن تا حەددێک یارمەتی خەڵکی کوردستان بدەن. من جارێکی دیکە سوپاسی خۆڕاگری و پشوودرێژیی ئەوان دەکەم و هیوادارم ئێمە بتوانین پێکەوە ئەم قۆناغە تێپەڕینین و ئەمە ببێتە دەستپێکێک بۆ کۆتاییهێنان بە ئابڵووقەی ئابووری کە کەوتووەتە سەر هەرێمی کوردستان و کۆتاییهێنان بە قەیرانی دارایی لە هەرێمی کوردستان و پێ بنێینە قۆناغێکی نوێتر".

هەروەها سەرۆکوەزیران مەسرور بارزانی هیواشی خواست، بتوانین لەگەڵ حکوومەتی فیدراڵی بگەنە ئەنجامی باش بۆ چارەی هەموو ئەو گرفتانەی کە لە نێوان حکوومەتی فیدراڵی و حکوومەتی هەرێمی کوردستاندا ماون.