سەرۆکوەزیران مەسرور بارزانی: هیوادارم جەژن ببێتە مایەی شادی و خۆشگوزەرانیی بۆ خەڵکی کوردستان
K24 – هەولێر:
سەرۆکی حکوومەتی هەرێمی کوردستان بەبۆنەی جەژنی ڕەمەزانەوە، پەیامێکی پیرۆزبایی بڵاوکردەوە و ئاماژەی بەوەکردووە: هیوادارم جەژن ببێتە مایەی خۆشی و شادی و خۆشگوزەرانیی بۆ خەڵکی کوردستان و کۆتاییهاتنی هەموو شەڕ و ناخۆشی و نەهامەتییەک لە جیهان.
ڕۆژی سێشەممە (9ـی نیسانی 2024) مەسرور بارزانی، سەرۆکی حکوومەتی هەرێمی کوردستان لە پەیامێکدا ڕایگەیاند: بەبۆنەی هاتنی جەژنی پیرۆزی ڕەمەزانەوە، گەرمترین پیرۆزبایی لە گشت موسڵمانانی كوردستان و عێراق و جیهان دەكەم، بە تایبەتی پیرۆزبایی لە پێشمەرگە قارەمانەکان و هێزەکانی ئاسایشی ناوخۆ و کەسوکار و بنەماڵەی سەربەرزی شەهیدان و ئەنفالکراوان دەکەم".
سەرۆکوەزیران مەسرور بارزانی ئاماژەی بەوەش کردووە: سوپاسی خۆڕاگری و پشوودرێژیی خەڵکی نیشتمانپەروەری هەرێمی کوردستان دەکەم کە هاوکار و یارمەتیدەرمان بوون لە تێپەڕاندنی ئەم دۆخە سەختە ئابوورییەی ڕووبەڕوومان بووەوە.
هەروەها سەرۆکی حکوومەتی هەرێمی کوردستان ڕاشیگەیاندووە: هیوادارم ئەو ڕێککەوتن و لەیەکگەیشتنەی لەگەڵ لایەنە پەیوەندیدارەکانی حکوومەتی فیدراڵ لەبارەی مووچە و شایستە داراییەکانی هەرێمی کوردستان دروست بووە، بەردەوام بێت و لەمەودوا، بابەتی مووچە کە مافێکی ڕەوا و دەستووریی خەڵکە، تێکەڵی هیچ کێشە و ناکۆکی و ململانێیەکی سیاسی نەکرێت و فەرمانبەر و مووچەخۆرانی هەرێمیش، مانگانە بە شێوەیەکی ئاسایی، لە ڕێگەی لایەنە پەیوەندیدارەکانی حکوومەتی هەرێمی کوردستانەوە مووچەکانیان وەربگرن.
لە کۆتایی پەیامەکەیدا، سەرۆکوەزیران مەسرور بارزانی دەڵێت: ئومێد دەکەین ئەم پێشکەوتن و هەنگاوانە، ببنە دەستپێکێک بۆ چارەسەرکردنی کێشە هەڵواسراوەکانی دیکەش و هەموو ئەو گرفتانەی ماون بە لەیەکگەیشتن و پابەندبوون بە دەستووەرەوە، چارەسەر ببن.
دەقی پەیامەکەی سەرۆکی حکوومەتی هەرێمی کوردستان
بە بۆنەی هاتنی جەژنی پیرۆزی ڕەمەزانەوە، گەرمترین پیرۆزبایی لە گشت موسڵمانانی كوردستان و عێراق و جیهان دەكەم، بە تایبەتی پیرۆزبایی لە پێشمەرگە قارەمانەکان و هێزەکانی ئاسایشی ناوخۆ و کەسوکار و بنەماڵەی سەربەرزی شەهیدان و ئەنفالکراوان دەکەم.
هیوادارم جەژن ببێتە مایەی خۆشی و شادی و خۆشگوزەرانیی بۆ خەڵکی کوردستان و کۆتاییهاتنی هەموو شەڕ و ناخۆشی و نەهامەتییەک لە جیهان.
سوپاسی خۆڕاگری و پشوودرێژیی خەڵکی نیشتمانپەروەری هەرێمی کوردستان دەکەم کە هاوکار و یارمەتیدەرمان بوون لە تێپەڕاندنی ئەم دۆخە سەختە ئابوورییەی ڕووبەڕوومان بووەوە. هیوادارم ئەو ڕێککەوتن و لەیەکگەیشتنەی لەگەڵ لایەنە پەیوەندیدارەکانی حکوومەتی فیدراڵ لەبارەی مووچە و شایستە داراییەکانی هەرێمی کوردستان دروست بووە، بەردەوام بێت و لەمەودوا، بابەتی مووچە کە مافێکی ڕەوا و دەستووریی خەڵکە، تێکەڵی هیچ کێشە و ناکۆکی و ململانێیەکی سیاسی نەکرێت و فەرمانبەر و مووچەخۆرانی هەرێمیش، مانگانە بە شێوەیەکی ئاسایی، لە ڕێگەی لایەنە پەیوەندیدارەکانی حکوومەتی هەرێمی کوردستانەوە مووچەکانیان وەربگرن.
هەروەها ئومێد دەکەین ئەم پێشکەوتن و هەنگاوانە، ببنە دەستپێکێک بۆ چارەسەرکردنی کێشە هەڵواسراوەکانی دیکەش و هەموو ئەو گرفتانەی ماون بە لەیەکگەیشتن و پابەندبوون بە دەستووەرەوە، چارەسەر ببن.
جەژنتان پیرۆز و خوای مەزن كوردستان بپارێزێت.
مەسرور بارزانی
سەرۆکی حکوومەتی هەرێمی کوردستان
جەژنی ڕەمەزانتان پیرۆز بێت و خوای مەزن كوردستان بپارێزێت.
— Masrour Barzani (@masrourbarzani) April 9, 2024
سوپاسی خۆڕاگری و پاڵپشتیی خەڵکی نیشتمانپەروەری کوردستان دەکەم لە تێپەڕاندنی ئەم دۆخە سەختەی ڕووبەڕوومان بووەوە. pic.twitter.com/NgI3BfGzAY
