ناتانیاهۆ: بە کۆنترۆڵکردنی دەروازەی ڕەفەح دوو ئامانجمان پێکاوە
حکوومەتی ئیسرائیل بە کۆی دەنگ پێشنیازەکانی حەماسی بۆ ئاگربەست ڕەتکردەوە
K24 - هەولێر
بنیامین ناتانیاهۆ سەرۆکوەزیرانی ئیسرائیل لە کۆبوونەوەی کابینەی بچووککراوەی حکوومەتی ئیسرائیل بۆ کاروباری جەنگ ڕایگەیاند، کۆنترۆڵکردنی دەروازەی سنووریی ڕەفەح دوو ئامانجی سەرەکی شەڕەکە دەپێکێت، یەکێکیان ڕزگارکردنی بارمتە و ڕفێندراوەکانی دەستی حەماسە، دووەمیشیان کۆتایی هێنان بە چەکدارانی حەماس.
نووسینگەی ڕاگەیدنی سەرۆکوەزیرانی ئیسرائیل بڵاویکردووەتەوە، لە کۆبوونەوەکەی وەزیرانی کابینەی جەنگ بە کۆی دەنگ بڕیاری ڕەتکردنەوەی پێشنیاز و داواکارییەکانی بزووتنەوەی حەماس دراوە بۆ ئاگربەست، هەروەها ئاماژەیانداوە، داواکارییەکان زۆر لە ویست و خواست و داواکارییە پێویستەکانی ئیسرائیل دوورن.
هەر بە گوێرەی ڕاگەیەندنەکەی کابینەی جەنگ، بە کۆ دەنگی وەزیرانی کابینەکە ڕایانگەیاندووە، ئیسرائیل هەرگیز بە پێشنیازێک ڕازی نابن کە ئاسایشی هاووڵاتییان و داهاتووی ئیسرائیل بخاتە مەترسییەوە.
لەلایەن خۆیەوە بنیامین ناتانیاهۆ سەرۆکوەزیرانی ئیسرائیل لە کۆبوونەوەکەدا گوتوویەتی: فەرمانم بەو شاندە کردووە کە سەردانی قاهیرەیان کردووە بۆ ئەوەی پێداگر و سووربن لەسەر مەرجی ئازادکردنی ڕفێندراوەکان و ئەو داواکارییانەی ئاسایش و سەقامگیری ئیسرائیل زامن دەکەن.
هەروەها کابینەکە کۆدەنگ بوون لە سەر ئەوەی چیتر ڕێگە بە بزووتنەوەی حەماس نادرێت هەژموون و دەسەڵاتی خراپی خۆی بە سەر کەرتی غەززە بسەپێنێت، ئەو دەرفەتەشی پێنادرێتەوە توانا سەربازییەکانی دووبارە رێک بخاتەوە و هەوڵی لەناوبردنی ئیسرائیل بدات.
ناتیاناهۆ ڕاشیگەیاندووە، لە شەڕی حەماس بەردەوام دەبین و کۆنترۆڵکردنی دەروازەی ڕەفەح هەنگاوێکی زۆر گرنگە، بە تایبەت بۆ لە ناوبردنی توانا سەربازییەکانی حەماس و لە ناوبردنی چوار لە کەتیبە چەکدارییەکانی کە لە ڕەفەح خۆیان مەڵاسداوە.
سوپای ئیسرائیل دوێنێ سێشەممە هێرشی کردە سەر دەوازەی سنووریی ڕەفەح کە کەرتی غەززە و میسر بە یەک دەگەیەنێت و بە تەواوی کۆنترۆڵی کرد و ئاڵای ئیسرائیل لە دەروازە سنوورییە بەرزکرایەوە، ئەمەش لە کاتێکدایە کە شاندی دانووستانکاری حەماس و ئیسرائیل لە قاهیرەن بۆ ئەوەی ڕێککەوتن لە سەر ئاگربەست و کۆتایی هێنان بە شەڕ بکەن و ناوەڕۆکی ئەو پێشنیازەی ئاگربەست ئاشکرا کراوە کە بزووتنەوەی حەماس ڕەزامەندی لە سەرداوە بۆ ڕێککەوتن، بەڵام ئیسرائیل ڕەتیکردووەتەوە و بەمەش ئەگەر هەیە شەڕەکە بەردەوام بێت و سوپای ئیسرائیل بەم نزیکانە هێرشی ناو شاری ڕەفەح بکات بۆ ڕاوەدونانی چەکدارانی حەماس و دۆزینەوە و ڕزگارکردنی بارمتە ڕفێندراوەکانی 7ی ئۆکتۆبەری ساڵی ڕابردوو.