ڕێکخەری ڕاسپاردە نێودەوڵەتییەکان و ڕیپۆرتەری تایبەتیی نەتەوە یەکگرتووەکان هەوڵەکانی نەهێشتنی ئەشکەنجەدان تاوتۆی دەکەن
ڕێکخەری ڕاسپاردە نێودەوڵەتییەکان ئاماژە بەوە دەکات کە، حکومەتی هەرێم ڕێوشوێنە یاساییەکان دەگرێتەبەر بۆ بنبڕکردنی ئەشکەنجە و مامەڵەی نامرۆڤانە و خراپ.
سێشەممە، 11ـی حوزەیرانی 2024، دیندار زێباری ڕێکخەری ڕاسپاردە نێودەوڵەتییەکان لە حکوومەتی هەرێم لەگەڵ ئەلیس جی ئیدواردز ڕیپۆرتەری تایبەتی نەتەوە یەکگرتووەکان بۆ ئەشکەنجەدان کۆبووەوە.
لەو کۆبوونەوەیەدا، باس لە ڕێوشوێنە یاساییەکان کرا کە حکومەتی هەرێم دەیگرێتەبەر بۆ بەرەنگاربوونەوەی هەمەلایەنە و بنبڕکردنی ئەشکەنجە و مامەڵەی نامرۆڤانە و خراپ.
بەپێی ڕاگەیەندراوێکی نووسینگەی ڕێکخەری ڕاسپاردەنێودەوڵەتییەکان، ڕێکخەری ڕاسپاردە نێودەوڵەتییەکان ئاماژەی بەوە کردووە، لە ساڵی 2023 دا سێ دۆسیەی ئەشکەنجەدان ڕەوانەی دادگای لێکۆڵینەوە لە چاکسازیی ئافرەتان و نەوجەوانان لە هەولێر کراوە، هاوکات یەک دۆسیە لە ڕاپەڕین و 28 دۆسیە لە سلێمانی کە کۆی گشتییان دەکاتە 32 دۆسیە ڕەوانەی دادگای لێکۆڵینەوە کراون.
سەبارەت بە بەرەنگاربوونەوەی ئەشکەنجەدان لەڕووی یاساییەوە، ڕێکخەری ڕسپاردە نێودەوڵەتییەکان ڕایگەیاندووە، ڕۆژی یەکی ئاداری 2023، خوێندنەوەی یەکەم بۆ ڕەشنووسی یاسای بەرەنگاربوونەوەی ئەشکەنجە و مامەڵەی خراپ لە پەرلەمانی کوردستان کراوە بۆ پاراستنی مافی زیندانیان. لە کانوونی دووەمی 2023 تا مانگی حوزەیرانی 2023، داواکاری گشتیی لێکۆڵینەوەی لە دۆسیەی (826) سزادراو کردووە، لەگەڵ ئەوەشدا بەشی تاوان و نەوجەوان بەدواداچوونی بۆ (1090) کەیس تەنها لە ماوەی ساڵی 2023 دا کردووە.
دیندار زێباری گوتی، حکوومەتی هەرێم پابەندە بە قەرەبوو کردنەوەی دادپەروەرانەی ئەو دەستگیرکراوانەی ئەگەر سەلمێندرا تووشی ئەشکەنجە بوونەتەوە بەپێی یاسای ژمارە 15ـی ساڵی 2010. هەروەها نووسینگەی ڕێکخەری ڕاسپاردە نێودەوڵەتییەکان ڕێکاری تایبەتی بۆ لایەنە پەیوەندیدارەکان دەرکردووە بۆ جێبەجێکردنی ڕاسپاردە نێودەوڵەتییەکانی تایبەت بە بەرەنگاربوونەوەی ئەشکەنجەدان لە چوارچێوەی پلانی حکوومەتی هەرێم بۆ مافەکانی مرۆڤ.