بەرووبوومی کشتوکاڵ و ئاوی کوردستان لە لەندەن گفتوگۆی لەبارەوە دەکرێت
لە 15ـهەمین ساڵیادی دامەزراندنی ئەنجوومەنی ئابووریی عێراقی بەریتانی(IBBC)لە شاری لەندەن، پرسی ساغکردنەوەی بەرووبوومی کشتوکاڵ و پۆند و بەنداوەکانی کوردستان، پرسی قسەو گفتوگۆکانی نێوان عێراق و بەریتانیا و هەرێمی کوردستان بوو.
وەزارەتی کشتوکاڵ و سەرچاوەکانی ئاو بڵاوی کردووەتەوە، تیمێکی باڵای وەزارەتەکەیان بەشدارییان لە کۆڕبەندی ئەنجوومەنی ئابووریی عێراقی بەریتانی IBBC لە لەندەن کردووە.
بەپێی زانیارییەکانی ئەو وەزارەتە، تیمی وەزارەتی کشتوکاڵ و سەرچاوەکانی ئاوی حکوومەتی هەرێمی کوردستان پێکهاتبوون لە بریکاری وەزارەت و ڕاوێژکار و بەڕێوەبەری گشتیی پلاندانان و بەدواداچوون، بە هاوڕێیەتی شاندێکی باڵای حکوومەتی هەرێمی کوردستان، بەشدارییان لە 15ـهەمین ساڵیادی دامەزراندنی ئەنجوومەنی ئابووریی عێراقی بەریتانی(IBBC)لە شاری لەندەن کردووە، لە ساڵیادەکەدا چەندین چاڵاکیی و پانێل و دیدار دەربارەی پەرەپێدانی پەیوەندییەکان و ئاسانکاریی بۆ دەرفەتەکانی وەبەرهێنان و ئەنجامدانی سەرمایەگوزاریی لە سێکتەرەکانی کشتوکاڵی و پیشەسازیی و بازرگانیی بەڕێوەچوو.
هاوکات تاوتوێی گۆڕانکارییەکانی کەش و هەوا و دیاردەی کەمبوونەوەی ئاو و کاریگەرییەکانی لەسەر کشتوکاڵ و ژینگە و ئاسایشی خۆراک و ئاسایشی ئاو لە جیهاندا کرا.
وەزارەتی کشتوکاڵ ئاشکرای کردووە، لەساڵیادی دامەزراندنی ئەنجوومەنی ئابووریی عێراقی بەریتانی، جەخت لە یەکخستنی دەرفەتە هاوبەشەکان و پێکەوە کارکردنی نێوان حکوومەتی بەریتانیا و حکومەتی عێراقی فیدراڵ لەگەڵ حکومەتی هەرێمی کوردستان کراوەتەوە بە مەبەستی جێبەجێکردنی پلانی ستراتیژی بەهێزکردنی ئاسایشی خۆراک و هەنگاونان بۆ خۆبژێوی و پاڵپشتی زیاتری جووتیاران، لە پێناو ئاسانکاریی بۆ ساغکردنەوەی بەرووبوومە خۆماڵییەکان، هەروەها سوود وەرگرتن لەسەرچاوەکانی ئاوی هەرێمی کوردستان بە دروستکردنی چەندین بەنداو و پۆند و پڕۆژەی ئاودێریی و هێنانەکایەی تەکنەلۆژیایی پێشکەوتووی وەبەرهێنانی کشتوکاڵی و زیادکردنی پانتایی سەوزایی و پارێزگاری لە ژینگە بەگشتی.
لەو ساڵیادەدا، تیمی وەزارەتی کشتوکاڵ پەیام و پلانی حکومەتی هەرێمی کوردستان و وەزارەتی کشتوکاڵ و سەرچاوەکانی ئاویان تایبەت بە ئاسانکارییەکانی لە بواری وەبەرهێنان لە کەرتی کشتوکاڵ و بازرگانیی کشتوکاڵیی و پیشەسازیی کرد .