ناوی سێ یەکەمەکانی زانکۆ حکوومییەکان بۆ دامەزراندن ڕەوانەی بەغدا دەکرێن
K24 – هەولێر:
لەسەر ڕاسپاردەی سەرۆکوەزیران مەسرور بارزانی بە مەبەستی داواکردنی تەرخانی دارایی بۆ دامەزراندنی سێ یەکەمەکانی زانکۆ حکوومییەکانی هەرێمی کوردستان لەلایەن حکوومەتی فیدراڵییەوە، وەزارەتی خوێندنی باڵا و توێژینەوەی زانستیی لیستی ناوەکانی ئاراستەی وەزارەتی دارایی و ئابووریی حکوومەتی هەرێمی کوردستان کرد.
دوای ئەوەی لە (23ـی نیسانی 2024) پێشەوا هەورامانی، گوتەبێژی حکوومەتی هەرێمی کوردستان ڕایگەیاند: سەرۆکوەزیران مەسرور بارزانی لایەنە پەیوەندیدارەکانی حکوومەتی هەرێم ڕاده‌سپێرێت بۆ ئه‌وه‌ی له ڕێگه‌ی وه‌زاره‌تی دارایی عێراق، هه‌وڵی جددی بۆ ته‌رخانكردنی دارایی بۆ هه‌موو سێ یه‌كه‌مه‌كانی دانه‌مه‌زراوی زانكۆ و په‌یمانگاكانی هه‌رێمی كوردستان بدرێت، وەزارەتی خوێندنی باڵا ناوی 12 هەزار و 286 دەرچووی سێ یەکەمەکانی ڕەوانەی وەزارەتی دارایی و ئابووریی حکوومەتی هەرێمی کوردستان کردووە بۆ ئەوەی ڕەوانەی بەغدا بکرێت.
پێشتریش سەرۆکایەتى ئەنجوومەنی وەزیرانی هەرێمی کوردستان بە نووسراوى ژمارە (1928) لە (2024/4/25) و وەزارەتی دارایی و ئابووریی بە نووسراوی ژمارە (3047) لە (22/5/2024) داوایان لە وەزارەتی خوێندنی باڵا و توێژنەوەی زانستیی کردبوو بۆ ئامادەکردنی ناوی سەرجەم سێ یەکەمەکانی دانەمەزراو لە زانکۆ و پەیمانگە حکوومییەکانی هەرێمی کوردستان.
نووسراوەکەی وەزارەتی خوێندنی باڵا و توێژنەوەی زانستی بە ژمارە (13001) لە (14/7/2024) کە ئاراستەی وەزارەتی دارایی و ئابووریی کردووە، ناوی سێ یەکەمەکانی ساڵانی خوێندنی (2017-2018) تاوەکوو (2022-2023) لەخۆدەگرێت کە ژمارەیان 12 هەزار و 286 دەرچووە و داوای دابینکردنی پلەی وەزیفی و تەرخانی دارایی کردووە.
بەپێی ڕاسپاردەی سەرۆکوەزیران مەسرور بارزانی، لەلایەن خۆیەوە وەزارەتی دارایی و ئابووریی حکوومەتی هەرێمی کوردستان سەرجەم ناوەکان دەنێرێتە وەزارەتی دارایی فیدراڵ بە مەبەستی تەرخانکردنی دارایی بۆ دامەزراندنی هەمیشەیی هەموو ئەو دەرچووانەی هەرێمی کوردستان.
